Bushati: Shqipëria e angazhuar për një luftë frontale kundër terrorizmit
Ministri i Jashtëm takon këshilltarin e Trump për Sigurinë
Gjatë
vizitës në Shtetet e Bashkuara, Ministri për Evropën dhe Punët e Jashtme, Ditmir Bushati u takua me këshilltarin e Presidentit amerikan për Çështjet e Sigurisë, Gjeneralin McMaster. Në këtë takim, i cili u përqendrua te sfidat e sigurisë në rajon ishin të pranishëm ministrat e Jashtëm të vendeve të Ballkanit Perëndimor. Ministri Bushati vlerësoi bashkëpunimin e deritanishëm mes të dy vendeve dhe falënderoi përfaqësuesin e lartë amerikan për mbështetjen që i ka dhënë Shqipërisë në ngritjen e kapaciteteve ushtarake në fushën e mbrojtjes si dhe asistencën për institucionet ligjzbatuese shqiptare në luftën kundër terrorizmit, krimit të organizuar dhe korrupsionit. Ai rikon- firmoi angazhimin e Shqipërisë për të vijuar mbështetjen e iniciativës së Presidentit Trump për një luftë frontale kundër terrorizmit në kuadër të koalicionit global si dhe për angazhimin e Shqipërisë për të kontribuar aktivisht në operacionet paqeruajtëse të Aleancës Atlantike në zonat konfliktuale. Gjenerali McMaster vlerësoi kontributin e Shqipërisë në luftën kundër ekstremizmit të dhunshëm e radikalizmit dhe pozicionimin e saj të qartë në funksion të stabilitetit demokratik në rajon. Më herët, Bushati mori pjesë në konferencën me temë "Stuhi e ardhshme? Formimi i së ardhmes në Ballkan në një epokë pasigurie", organizuar nga Këshilli Atlantik. "Kontributin e Shteteve të Bashkuara dhe koordinimin e saj me Bashkimin Evropian e shoh shumë të rëndësishëm të paktën në tri fusha: sa i përket reformave në fushën e sigurisë, sundimin e së drejtës në ekonomi dhe çështje që kanë lidhje me zhvillimin ekonomik, aq më tepër kur sfidat me të cilat po përballet rajoni ynë, janë sfida si për Bashkimin Evropian edhe për SHBA- të", - tha Bushati.