Ish- kreu i Burgjeve: S'kam faj, me Labin kam pasur marrëdhënie të ngrira
Korrupsioni, ish- zëvendësi deklaroi në gjyq se i dha biznesmeni 20 mln lekë Artur Zoto- prokurores: Ju e dini pse jam këtu
Ish- drejtori i Burgjeve, Ar tur Zoto, i cili akuzohet për "Korrupsion pasiv" gjatë një procedure tenderimi të ushqimit në burgje, pretendon pafajësinë. Zoto është marrë dje sërish në pyetje pranë Krimeve të Rënda, ku tregoi edhe raportet institucionale që kishte me zv. drejtorin e Burgjeve, Iliaz Labi. Kjo seancë u zhvillua dy javë pasi ish- vartësi i tij Labi tha në sallën e gjyqit se i kishte dorëzuar në zyrë 2 milionë lekë ryshfet Artur Zotos. Para trupës gjykuese ishdrejtori i Burgjeve ka mohuar kategorikisht akuzat dhe përfshirjen e tij në këtë aferë korruptive. Më herët në seancën e 15 nëntorit gjatë dëshmisë së tij Labi theksoi se biznesmeni Shemsi Sinani i ka dhënë 20 milionë lekë te një lokal te Blloku, të cilat duhet t'ia jepte ish- drejtorit. Ndërkohë Artur Zoto shprehet se nuk ka bërë asnjë faj dhe se marrëdhëniet me Labin ishin të ngrira. "Nuk kam asnjë faj. Me Iliaz Labin kam pasur komunikim të ngrirë. Ai nuk ka qenë asnjëherë në zyrën time. Madje nuk kam pasur asnjë komunikim dhe as takim me biznesmenët. Nëse jam këtu për gjëra të tjera, e dini ju. Gjykata të ngrejë një komision të veçantë që të verifikojë tenderin për të cilin akuzohem",- tha Zoto. I pandehuri Zoto përjashtoi veten edhe nga kontaktet me pesë biznesmenët garues për tenderin, të pandehur në një procedim të veçuar. "Nuk i njoh pesë biznesmenët. Nuk kam pasur ndonjëherë komunikim telefonik me ta. As nuk i kam takuar ndonjëherë dhe as adresuar njeri që t'i takojë",- tha ai.
AKUZA
Ish- drejtori i Burgjeve, Artur Zoto dyshohet se është i përfshirë në korrupsionin me tenderët e ushqimeve, për të cilat u arrestua edhe zv/ drejtori i Burgjeve Iljaz Labi. Një seri bisedash të përgjuara nga Prokuroria e Krimeve të Rënda, kanë ngritur dyshime të forta për implikimin të Zotos në aferat korruptive në tenderët e ushqimit në burgje. Në dosjen hetimore, ndodhen dhjetëra procesverbale me biseda të transkriptuara, të cilat tregojnë se drejtori Zoto, tashmë i dorëhequr ka qenë në dijeni të këtyre aferave korruptive, dhe se Iljaz Labi nuk bënte asnjë hap, pa miratimin e tij. Dy ditë pas operacionit të arrestimit të zëvendësit të tij, Iljaz Labi dhe katër biznesmenëve Elidjan Laskaj, Ylber Kalaja, Shemsi Sinani e Nexhmi Balla, Drejtori i Përgjithshëm i Burgjeve ka dhënë dorëheqjen, duke ia justifikuar largimin ministrit të Drejtësisë, Manjani nëpërmjet një letre, ku i shkruante se ishin motivet personale dhe familjare të tij, që e çonin në largimin nga kjo detyrë. Në një seri bisedash të përgjuara, pasqyrohet dhe një bisedë mes biznesmenëve Nexhmi Balla dhe Elidjan Laskaj, ku Nexhmiu e pyet Elidjanin se çfarë kishte bërë. Nga ana tjetër Elidjani i thotë se sa kishte dalë nga Drejtoria e Burgjeve.