Ruçi- Pelosi: Shqipëria, aleat i rëndësishëm i SHBA në Ballkan
Kryetari i Kuvendit të Shqipërisë u takua dje, në Kongresin Amerikan, me kryetarin e Dhomës së Përfaqësuesve, z. Paul Ryan, me kryetaren e demokratëve në Dhomën e Përfaqësuesve znj. Nancy Pelosi dhe me kryetarin e shumicës republikane në Dhomën e Përfaqësuesve z. Kevin Mc Carthy. Në bisedë me kryetaren e demokratëve në Dhomën e Përfaqësuesve znj. Nancy Pelosi, u vlerësuan marrëdhëniet shumë të mira ndërmjet SHBA- ve dhe Shqipërisë. Lidhur me këtë, znj. Pelosi u shpreh se: "Shqipëria është një aleat i rëndësishëm i Shteteve të Bashkuara në Amerikës në Gadishullin e Ballkanit". Kryetari i Kuvendit të Shqipërisë, pasi e falënderoi znj. Pelosi për mikpritjen, theksoi rëndësinë e vijimit intensifikimit të marrëdhënieve shumë të mira ndërmjet dy vendeve. Z. Ruçi vlerësoi kontributin e dhënë nga kryetarja e demokratëve në Dhomën e Përfaqësuesve në Kongresin Amerikan duke u shpre- hur se: "Keni mirënjohjen tonë për mbështetjen dhe angazhimin tuaj personal ndaj Shqipërisë". Gjatë takimit, z. Ruçi e ftoi znj. Pelosi për të vizituar Shqipërinë. "Është dëshira ime dhe e parlamentit shqiptar që ju të vizitoni Shqipërinë",- nënvizoi ndër të tjera Kryetari i Kuvendit. Ftesa e z. Ruçi u pranua nga znj. Pelosi, e cila tha se do të jetë kënaqësi që të vizitojë Shqipërinë. Znj. Nancy Pelosi, gjithashtu, i tha z. Ruçi se në grupin e kongresmenëve demokratë keni një mik të mirë të shqiptarëve si z. Eliot Engel. Duke marrë fjalën në takim, kryetari i Grupit Parlamentar të Partisë Socialiste, z. Taulant Balla u shpreh: "Ne i jemi shumë mirënjohës Partisë Demokratike Amerikane për vëmendjen ndaj Shqipërisë dhe shqiptarëve dhe duam të rrisim më tej bashkëpunimin".