Gramoz Ruçi ka një mesazh për politikanët: Më shumë luajalitet
Kreu i Kuvendit: Janullatos ta gëzojë nënshtetësinë shqiptare Balla: Toleranca fetare, pasaporta më e mirë e shqiptarëve në botë
Kryetari i Kuvendit të Shqipërisë z. Gramoz Ruçi, më rastin e festës së shenjtë të Krishtlindjes, vizitoi Qendrën Sinodike të Katedrales Ortodokse "Ringjallja e Krishtit", ku u prit nga Fortlumturia e Tij, Kryepeshkop Anastasi. Kreu i Kuvendit, Ruçi u përcolli të gjithë shqiptarëve urimin e tij për festën e shenjtë të Krishtlindjes duke u shprehur se: "Nga thellësia e zemrës në këtë ditë shumë të lumtur i uroj të gjithë besimtarëve të krishterë gëzuar Krishtlindjen! Po kështu i uroj të gjithë shqiptarët që vitit 2018 të jetë një vit i begatë, një vit i dashurisë, i respektit, i mirësisë, i solidaritetit dhe i shpresës. Dhe të gjithë politikanëve do t'i uroja më shumë luajalitet. Duke iu përgjigjur interesimit të medias lidhur me dhënien e shtetësisë shqiptare të Kryepeshkop Anastasi, z. Ruçi tha se i përcolli dy urime Kryepeshkopit Anastasi, e para për Krishtlindjen dhe e dyta për shtetësinë shqiptare. "Unë jam këtu për ta uruar hirësinë Janullatos, dy urime bashkë, e para Krishtlindjet dhe e dyta ta gëzojë shtetësinë shqiptare",- u shpreh Ruçi. Nga ana tjetër, edhe kreu i Grupit Parlamentar të PS- së, Taulant Balla vlerësoi dhënien e shtetësisë shqiptarë për kryepeshkopin Anastas Janullatus. Vendimin e Presidentit Meta, Balla e quajti si diçka shumë të mirë edhe pse të vonuar. Balla, gjithashtu, vlerësoi bashkëjetesën fetare mes shqiptarëve. "Së pari kjo është një ditë e bukur për të gjithë shqiptarët. Harmonia fetare e pagjendur në asnjë vend tjetër në botë përveç në Shqipëri ka bërë që edhe në myslimanët ta festojmë me po të njëjtën ndjenjë këtë festë",- u shpreh kreu i Grupit Parlamentar të PS- së. "Familjet tona janë të përbëra edhe nga të krishterë dhe nga myslimanë, por ky është shembulli dhe pasaporta më e mirë e shqiptarëve në botë. Sa i përket pyetjes tuaj. është diçka shumë e mirë edhe pse e vonuar",- tha Balla, i shoqëruar në këto vizita nga bashkëshortja e tij. Kryeministri Edi Rama ndodhet në Shtetet e Bashkuara të Amerikës dhe prej andej ai ka uruar shqiptarët për Krishtlindjet. Herët në mëngjes, Rama postoi një video me pamje nga qytete të ndryshme të vendit, nga Elbasani, Tirana, Durrësi, Vlora të stolisura në dritat e festave të fundvitit.