Filmoi votën në 25 qershor, gjykata e Tiranës jep dënimin e parë për krim elektoral
21- vjeçari do të kryejë 80 orë punë në interes të publikut
Gjykata
e Tiranës ka dhënë dënimin e parë për fotografimin e votës. Bëhet fjalë për një 21vjeçar në Tiranë, i cili fotografoi votën e tij në zgjedhjet e 25 qershorit. Ai u dënua me 2 muaj burg, por kjo masë iu konvertua në 80 orë punë në interes të publikut. Bëhet fjalë për shtetasin Denis Nuhaj i cili u akuzua nga gjykata e Tiranës për veprën penale "Shkelje të fshehtësisë së votimit". Ndryshimi ligjor i bërë përpara zgjedhjeve parlamentare të 25 qershorit 2017 për dënimin me burg të personave që fotografonin fletën e votimit nuk është marrë seriozisht nga një 21- vjeçar në Tiranë. Ai nuk ka ngurruar të shkelë ligjin dhe tashmë do të vuajë pasojat. Nuhaj është gjykuar në gjendje të lirë dhe përpos këtij dënimi ai nuk do të shkojë në qeli. Përfundimisht gjykata ka zëvendësuar dënimin me burg me një dënim alternativ, sipas të cilit 21 vjeçari është i detyruar për të kryer 80 orë punë të papaguar me interes publik. Sipas vendimit të shpallur nga gjyqtarja Ardiana Beraj, i riu është ndaluar ditën e zgjedhjeve. Ai është kallëzuar nga kryetarja e qendrës së votimit të ngritur në ambientet e shkollës "Dëshmorët e lirisë" në kryeqytet. Atij i është bllokuar në cilësinë e provës materiale edhe një aparat telefonik iPhone me të cilin kishte fotografuar fletën e tij të votimit. Para hetuesve i riu ka deklaruar se votonte për herë të parë dhe se nuk e dinte se fotografimi i votës ishte vepër penale. Ai ka theksuar se nuk e kishte bërë foton për ndonjë përfitim material.