Drekë Krishtlindjesh për të moshuarit dhe njerëzit në nevojë
Bashkia e Tiranës e të rinjtë vullnetarë urojnë festën nga mensa sociale Erion Veliaj: Solidaritet ndaj këtyre kategorive
Me rastin e kremtim it të festës së Krishtlindjeve, Bashkia e Tiranës shtroi drekën për të moshuarit dhe njerëzit në nevojë që frekuentojnë mensat sociale të kryeqytetit. Kryebashkiaku Erion Veliaj, i shoqëruar nga të rinj vullnetarë, uruan festën për këto kategori në një mënyrë tejet të veçantë për të tretin vit radhazi, ku shërbyen drekën në mensën sociale në Kombinat. Kjo drekë Krishtlindjesh, përcolli edhe njëherë mesazhin se nëpërmjet vullnetit e dëshirës, mund të arrihen gjëra shumë të mira, duke i ofruar një ndihmë të madhe të gjithë nevojtarëve. "Sot është një ditë e veçantë, është Dita e Krishtlindjes, dita kur dashuria e mund urrejtjen, kur shpresa e mund frikën, kur drita e mund errësirën dhe unë besoj se në qytetin tonë, qytet me 1 milion vetë, qytet hallemadh, por, kur ka dashuri, kur ka mirësi, kur ka vullnet ne mund të bëjmë gjëra të mrekullueshme. Ndaj më vjen mirë që u bë 2 vjet e gjysmë që qendrat tona sociale funksionojnë me ritëm të plotë, që kemi jo vetëm një vend për të kaluar një vakt, por edhe në vend për të pasur një shok, një shoqe, edhe një vend tjetër për të pasur pranë dikë për të qarë një hall, për të kujtuar, për të kërkuar ndihmë",- u shpreh Kryetari i Bashkisë. Ky i fundit nënvizoi se për një Tiranë më të mirë, duhet që çdokush prej nesh të tregohet solidar dhe të ndihmojë të gjithë ata që nuk kanë mundësi. "Dua t'ju falënderoj me gjithë zemër që e keni mbështetur këtë projekt dhe që sot këtu kemi një nga qendrat dhe modelet më mira se si mund ta ndihmojmë njëri- tjetrin. Në 2018, nëse çdo shqiptar, çdo tiranas që është në gjendje, të ndihmojë një fqinj, një komshi, që mund të jetë solidar me dikë që është në nevojë, besoj që mund të kemi një qytet të mrekullueshëm",shtoi Veliaj. Më tej, ai shprehu mirënjohjen dhe falënderimet e tij për të gjithë personat që i janë bashkuar nismave të ndërmarra nga Bashkia e Tiranës, duke dhuruar diçka apo duke shërbyer në mensat sociale. "Shumë faleminderit të gjithëve. Dua të ngre një dolli për të gjithë ata që shërbejnë këtu, duke falënderuar djalin që ka gatuar, të gjithë punonjësit socialë që e bëjnë këtë punë përditë, dua t'i japim një duartrokitje të gjithë studentëve që na
kanë ardhur për të na ndihmuar dhe të gjithë atyre që nga pasuria e zemrës së tyre shërbejnë në qendrat tona sociale. Kështu që, dua ta
ngre këtë dolli për ju, gëzuar Krishtlindjet, gëzuar Vitin e Ri, mbarësi!", uroi kryebashkiaku. Ndërkaq, ky i fundit përcolli urimet më të
përzemërta drejt besimtarëve të krishterë me rastin e festës së Krishtlindjeve. Kryetari i Bashkisë së Tiranës fillimisht bëri një
vizitë në selinë e Vëllazëria Ungjillore dhe më pas mori pjesë në pritjen e Kishës Ortodokse ku uroi Kryepeshkopin e Tiranës,
Durrësit, dhe gjithë Shqipërisë, Fortlumturinë e Tij, Anastas Jannullatos, e më pas, edhe gjithë shqiptarët kudo që ndodhen.