Manastirliu feston me fëmijët pa kujdes prindëror, apel për birësimin e tyre
Ministrja: U birësuan 17 fëmijë brenda këtij viti
Në
festën e Krishtlind jeve, ministrja e Shëndetësisë dhe Mbrojtjes Sociale, Ogerta Manastirliu zgjodhi të jetë pranë fëmijëve pa kujdes prindëror. Ajo vizitoi vogëlushët e Shtëpisë së Foshnjës "Hana dhe Rozafa" e iu shpërndau dhuratat për t'ia u bërë më të gëzueshme festat. "Sot festohet në institucionet tona të kujdesit social në të gjithë Shqipërinë dhe jam shumë e lumtur të kaloj këtë festë mes 32 fëmijëve të Shtëpisë së Foshnjës. Është detyrim i ynë për t'u kujdesur për foshnjat që janë pa kujdes prindëror dhe kemi angazhimin maksimal për t'u ofruar standardet më të larta të kujdesit fëmijëve",- u shpreh Ministrja e Shëndetësisë dhe Mbrojtjes Sociale. Më tej, kjo e fundit bëri apel për cilindo që ka mundësi t'u ofrojë një familje të ngrohtë fëmijëve pa kujdes prindëror, ku theksoi se brenda 2017, është arritur birësimi dhe kthimi i 17 vogëlushëve në familjet biologjike. "Objektivi ynë është të deinstitucionalizojmë shërbimet dhe të kthejmë sa më shumë fëmijë, në rastin më të mirë pranë familjes biologjike apo familjeve alternative birësuese. Vetëm gjatë këtij viti, nga kjo qendër u kthyen pranë familjeve biologjike dhe u birësuan 17 fëmijë dhe 3 fëmijë janë në proces birësimi",- tha Manastirliu. Duke uruar festat, ministrja shprehu mirënjohjen dhe falënderoi edukatorët, kujdestarët, punonjësit socialë dhe të gjithë stafin e 28 qendrave të kujdesit social që kujdesen çdo ditë jo vetëm për fëmijët, por për të gjithë kategoritë në nevojë.