Komisioni për "Tahirin", Alibeaj: Do verifikojmë a u pengua prokuroria

Deputeti

i Partisë Demokratike, Enkelejd Alibeaj tha dje, se ngritja e Komisionit Hetimor për rastin e ish- ministrit të Brendshëm Saimir Tahiri, dhe fenomenin e kultivimit të drogës në vend, është aksioni i parë politik që do zgjasë gjashtë muaj, e që PD angazhohet të zbardhë të vërtetën. Në emisionin "Kjo javë" me Nisida Tufën në "News24", deputeti demokrat thotë se këto dy çështje janë në interes të publikut, pasi fenomeni i kultivimit të drogës është zgjeruar ndjeshëm pas vitit 2013. Sipas Alibeajt, gjatë punimeve të këtij komisioni do të diskutohet nëse ka pasur pengesë të punës së prokurorisë për rastin "Tahiri". Duke përmendur ekstradimin e Nezar Seitit drejt Italisë, Alibeaj tha se një veprim i tillë u bë pengesë për hetimet e prokurorisë. Alibeaj tha se në komision mund të ftohet sërish Saimir Tahiri, por edhe Basha e Berisha, sipas ecurisë së punës. "Nuk ka ndonjë të fshehtë të madhe për të kuptuar punën e komisionit hetimor. Objektiv i komisionit janë përcaktuar dy çështje kryesore, së pari, për fenomenin e kultivimit dhe trafikimit të lëndëve narkotike. Ky fenomen ka pasur edhe mbështetje politike, madje një zhytje totale politike, siç është rasti i përfshirjes së ish- ministrit të Brendshëm Saimir Tahiri. Së dyti, pra është çështja e përfshirjes së ish- ministrit Tahiri. Komisioni hetimor nuk heton hetimet e prokurorisë, nuk e lejon ligji, Kushtetuta, ajo çka ne kemi interes është korrektesa ligjore, pra fakti: "A e kanë mbështetur apo e kanë penguar të drejtën për të hetuar të organeve të prokurorisë",- u shpreh deputeti i PD.