Studimi, 29 HEC- e në zona të mbrojtura në gjithë vendin
Financimet e hidrocentraleve, kryeson BERZH me 61 projekte Banka dha financime miliona euro për ndërtimet e impianteve
Banka Europiane për Rindërtim dhe Zhvil limi është financuesi më i madh i hidrocentraleve në Ballkan, duke mbështetur një total prej 61 impiantesh me 126 milionë euro, 29 prej tyre brenda zonave të mbrojtura, ose zonave të rrezikuara të biodiversitetit të pranuara ndërkombëtarisht. Në këtë përfundim arrin një studim i CEE Bankwatch Network, i cili mbulon Shqipërinë, Bosnje- Hercegovinën, Bullgarinë, Kroacinë, Kosovën, Maqedoninë, Malin e Zi, Serbinë dhe Slloveninë. Sipas studimit, megjithëse banka ka qenë më e kujdesshme vitet e fundit, ende po konsideron financimin e impianteve të reja edhe në vendin tonë.
FINANCIMET
BERZH është banka udhëheqëse ndërkombëtare që administron një studim mjedisor dhe social për kaskadën e Skavicës, çka sipas autorëve të studimit do të thotë se kjo bankë mund të financojë hidrocentralin nëse studimet tregojnë se projekti mund të bëhet sipas standardeve të saj, ndërsa kredia do të jetë së paku 202 milionë euro. Studimi, gjithashtu, zbulon edhe investimin më të madh të një banke tregtare në Ballkanin Perëndimor, një hua prej 178 milionë euro nga banka turke IsBank për Ayen Enerji për kaskadën e lumit Fan. Ky projekt u shoqërua nga një sërë konfliktesh të dhunshme me komunitetet lokale. Duke pasur parasysh se e njëjta kompani projekti është e përfshirë në projektet Poçem dhe Kalivaç në luginën e Vjosës, kjo ngre shqetësime se financuesit turq do të përfshihen edhe në këto projekte, dhe, për shkak të mungesës së transparencës dhe standardeve mjedisore e sociale, do të injorojnë shkatërrimin e ekosistemeve jetike të Vjosës. Ndërkaq, sipas autorëve të studimit, financuesit duhet të marrin pjesën e tyre të përgjegjësisë dhe të sigurojnë pajtueshmëri me standardet kombëtare dhe ndërkombëtare, pasi vendimet e investimeve të pakujdesshme mund të shkatërrojnë qindra lumenj të pacenuar të Ballkanit në mënyrë të pakthyeshme.