Përmbytjet, zona e Nënshkodrës ende nën ujë
SHKODËR - Zona e Nënshkodrës vazhdon të jetë e mbuluar nga uji. Prej disa ditësh forcat e ushtrisë qëndrojnë në gatishmëri për të përballuar çdo emergjencë të mundshme edhe pse fatmirësisht ka pasur vetëm një rast të tillë. Me dhjetëra shtëpi ndërkohë janë të rrethuara nga uji. Situata ndryshon me orë, por prej 3 ditësh sipërfaqja nën ujë është e njëjtë, 2400 hektarë. Në zonat e përmbytura të Nënshkodrës nuk mund të flasësh për një jetë të qetë, pasi frika bashkëjeton me këto familje. Uji u ka shkuar deri në pragun e shtëpisë, e rrezikon të hyjë brenda tyre. Në Obot ushtria ka mundur të hyjë paradreken e së shtunës me mjete të larta, por niveli i ujit në rrugë shkon afro 1 metër. Varkat mund të rikthehen në përdorim për transportimin e banorëve dhe ushqimeve. Komandant i Batalionit Vau Dejes, Ali Mali, tha dje se të paktën edhe për 48 orët e ardhshme ushtria do të vijojë të qëndrojë me shërbim 24 orësh në këtë zonë, për t'iu ardhur në ndihmë banorëve. "Parashikohet një rritje e nivelit të ujit në krahasim me ditën e djeshme, deri në këto momente kemi lëvizur vetëm me moto- varka. Ndërsa në këtë moment sapo bëmë rrugën e parë dhe me mjetet e kalueshmërisë së lartë. Veç transportit të banorëve të nxënësve të shkollës, njerëzve të sëmurë, banorëve të ndryshëm që lëvizin për punë dhe duhet të qarkullojnë nga fshati Obot për në Oblikë dhe Shkodër. Kemi transportuar dhe bazë ushqimore për blegtorinë",- pohoi Mali. Në Dajç sipërfaqja e përmbytur është me e vogël, por 30 shtëpi në Shirq dhe Mushan janë të rrethuara nga uji. Banorët kanë shqetësim kryesor dëmshpërblimin dhe bazën ushqimore për gjënë e gjallë. Shkarkimet nga hidrocentrali i Vau Dejësit vijojnë dhe sot niveli i tyre ka rënë në 600 metër/ kub për sekondë. Rritje e nivelit të ujit vërehet në liqenin e Shkodrës dhe lumin Buna.