Përkeqësohet situata në qarkun e Shkodrës, nën ujë 2520 ha tokë dhe 155 banesa
Reshjet, qyteti i Durrësit kthehet në "Venecia"
SHKODËR - Rëndohet situata e përmbytjeve në Shkodër. Sipas informacioneve nga autoritetet lokale, por edhe nga Ministria e Mbrojtjes ka rritje të sipërfaqes së tokës nën ujë. Ndërkohë që në të gjithë territorin e saj vazhdojnë reshjet e shiut. Sipas burimeve nga Ministria e Mbrojtjes, në qarkun e Shkodrës janë përmbytur rreth 2520 ha tokë. Ndërsa, 155 banesa janë nën ujë. Konkretisht në njësinë administrative Bushat, Bashkinë Vau- Dejës ka pasur rreth 390 ha tokë të përmbytur. Në Bashkinë Shkodër, nëzonën e Livadeve janë përmbytur 60 ha. Në këtë lagje ndodhen mbi 40 banesa me prezencë uji afër oborreve të tyre dhe nga këto 4 familje mbajnë bagëti, ku si pasojë e fushave të përmbytura paraqiten vështirësi në sigurimin e ushqimit për to. Familjet e këtyre banesave furnizohen me ujë të pijshëm nëpërmjet puseve dhe ky paraqitet si problem. Në lagjen ' Ajasëm' janë rreth 80 dynymë tokë e mbuluar nga uji dhe si pasojë 5 familje të kësaj lagjeje, të cilat mbajnë rreth 100 krerë bagëti, kanë vështirësi në sigurimin e ushqimit për to. Njësia Administrative Bërdicë: Ka pasur rreth 290 ha tokë të përmbytura. Njësia Administrative Dajç: Ka pasur rreth 780 ha
tokë të përmbytur pasi niveli i ujit ka pësuar rritje me rreth 12 cm. Në lagjen Zadrimë, Marinaj dhe Maçit, të fshatit Shirq, kanë qenë të izoluara nga prezenca e ujit 20 familje dhe në fshatin Mushan 5 familje. Kërkohet
të ndërhyhet për lartësimin e argjinaturës së Pentarit në rreth 300 ml gjatësi. Njësia Administrative Ana e Malit: Ka pasur rreth 1200 ha tokë të përmbytur ( fshati Muriqan 420 ha, fshati Oblikë 580 ha dhe fshati Obot 200 ha), pasi niveli i ujit ka pësuar rritje me rreth 20 cm. Në fshatin Obot kalimi është bërë vetëm me automjete të kalueshmërisë së lartë dhe me varka e gomone. Ujësjellësi Oblika 1 vazhdon të jetë jashtë funksionit si pasojë e përmbytjeve. Bashkia Shkodër ka vazhduar me 2 mjete autobote furnizimin e banorëve me ujë të pijshëm. Njësia Administrative Rrethina: Ka pasur rreth 60 ha tokë të përmbytur. Njësia Administrative Guri i Zi: Ka pasur rreth 5 ha tokë të përmbytur. Gjithsej, në Bashkinë Shkodër janë rrethuar nga uji rreth 155 banesa prej të cilave: 70 banesa në fshatin Obot, 15 banesa në fshatin Gorricë, 15 banesa në fshatin Shirq, 15 banesa në fshatin Mushan dhe 40 banesa në zonën e Livadheve.
DURRËS
Qyteti i Durrësit dje ngjante me Venecian. Reshjet e dendura të shiut kanë përmbytur rrugët e këtij qyteti, ndërsa në zonën e ishKënetës, uji ka arritur deri në 1.5 metra. Situata në këtë qytet dhe konkretisht në shëtitoren "Taulantia", rrugën "Aleksandër Goga", zona te stadiumi, te stacioni i trenit, lagja nr. 13, Shkozeti, etj. Në Currila ka rrëshqitje dherash ndërsa rruga e pakalueshme.