Meta: Më shumë kandidate të zonjat për kryetare bashkish
Presidenti merr pjesë në forumin "Gratë në shërbimin publik" "Administratë e depolitizuar dhe profesionale"
Presidenti i Republikës, Ilir Meta kërkoi nga partitë politike të kandidojnë më shumë gra e vajza në zgjedhjet për kryetarë bashkie. Meta mori pjesë dje në forumin "Gratë në shërbimin publik, zbatimi i të drejtave, realitete dhe sfida në vendimmarrje". Në këtë aktivitet ishin të pranishëm ish- Presidentja e Republikës së Kosovës, znj. Ahtifete Jahjaga; deputete, përfaqësuese të institucioneve të ndryshme, shoqëria civile etj. Gjatë fjalës së mbajtur në këtë forum Presidenti Meta tha se reforma në administratën publike ka një rëndësi madhore në procesin e integrimit europian dhe është "gur themeli" në krijimin e shtetit të së drejtës, në përmbushjen e reformave strukturore dhe në garantimin e mirëqeverisjes. Gjithashtu, Presidenti i Republikës theksoi se angazhimi i grave në administratën publike është fakt i pamohueshëm emancipimi social në Shqipëri, ndërsa bëri një apel për institucionet, Parlamentin, shoqërinë civile, botën akademike, median apo sektorin privat, që t'i japin prioritet më shumë në punën e tyre respektimit të lirive dhe të drejtave të grave dhe vajzave.
"Gjithashtu, nuk mund të lë pa përmendur rëndësinë që ka promovimi i sa më shumë modeleve të suksesit të grave dhe vajzave në politikën aktive, përfshirë edhe zgjedhjet e ardhshme vendore, ku shpresoj të kemi më shumë kandidate të zonja për të garuar si kryetare bashkish apo për të qenë në drejtimin e këshillave bashkiake", u shpreh Meta. Sipas tij, "investimi në krijimin e një administratë publike të depolitizuar dhe profesionale duhet të jetë prioriteti numër një dhe përmirësimi i saj duhet të jetë sfida e përditshme e mirëqeverisjes". "Kualifikimi dhe trajnimi i vazhdueshëm i burimeve tona njerëzore, të administratës publike në mënyrë të veçantë, por edhe të sektorit privat duhet të jetë i vazhdueshëm dhe në funksion të progresit dhe sfidave aktuale të globalizimit. Në finale, administrata publike duhet të ofrojë shërbime utilitare më cilësore që kënaqin pritshmëritë e qytetarëve", tha kreu i shtetit. "Nëse barazia gjinore është akoma një betejë e papërfunduar, për mijëra gra dhe vajza që akoma dhunohen në liritë dhe të drejtat e tyre, angazhimi i tyre në administratën dhe shërbimin publik në të gjitha nivelet e saj, tashmë është një fakt i pamohueshëm emancipimi social në Shqipëri. Statistikat flasin se kemi më shumë vajza dhe gra në administratën publike dhe për këtë duhen përgëzuar vetë ato, sepse në radhë të parë është një meritë e tyre dhe kërkesat e larta që kanë për edukimin dhe trajnimin e vazhdueshëm", theksoi presidenti. "Më shumë sesa barazia gjinore apo diskriminimi pozitiv, sidomos në politikëbërje dhe në politikë, duhet të vlerësojmë asetet intelektuale dhe profesionale të grave dhe vajzave në karrierë, të cilat kanë qenë në lartësinë e përgjegjësive të pozicioneve të larta publike që kanë mbajtur", nënvizoi Meta.
PROPOZIMI
"Më shumë se sa barazia gjinore apo diskriminimi pozitiv, sidomos në politikëbërje dhe në politikë, duhet të vlerësojmë asetet intelektuale dhe profesionale të grave dhe vajzave në karrierë, të cilat kanë qenë në lartësinë e përgjegjësive të pozicioneve të larta publike që kanë mbajtur", - tha Meta.