Përmbytjet, Bushati dhe Xhaçka: Shteti, në krye të detyrës
Ministrat
Ditmri Bushati dhe Olta Xhaçka ndodhen në Shkodër, ku kanë inspektuar zonat e përmbytura. Ata ndaluan në fshatin Dajç ku u takuan me banorët. "Shteti në krye të detyrës. Po ndjekim situatën dhe kemi marrë masa për jetën e njerëzve dhe gjësë së gjallë",- tha Bushati. Kurse sipas ministres së mbrojtjes nevojitet koordinim me qeverisjen lokale. "Forcat e Armatosura janë prezente nga dita e parë. Nevojitet koordinim institucional me pushtetin lokal. Pritet të mbërrijnë 300 tonë koncentrat për bagëtinë",- theksoi znj. Xhaçka. I pranishëm dhe deputeti demokrat Romeo Gurakuqi, cili vlerësoi punën e ushtrisë dhe policisë. Ministrja e Mbrojtjes, në një reagim të saj, u shpreh se "në Shkodër vazhdojmë të jemi në këmbë 24 orë në 24, që prej minutës së parë, kudo ku uji ka paralizuar jetën e njerëzve, në Obot, Dajç, Ana e Malit, Trush, Livadhë, Velipojë apo Bushat". "Kushdo që thotë se, ushtria nuk e njeh terrenin mirë, me siguri ka shkuar vetëm në ato zona ku e gërryen meraku për militanët. Për ne, banorët e Shkodrës janë qytetarë të Shqipërisë! Ndaj sot e përherë, përtej llafeve e sajesave përçarëse politike e mediatike, do të trajtohen njësoj, për t'i bërë ballë të gjithë bashkë, tërbimit të natyrës, që na ka sjellë këto ditë të vështira", tha Xhaçka. "I bëjmë thirrje pushtetit vendor dhe administratorëve lokalë, të lënë llafet e propagandën boshe të politikës ndarëse të ditës, dhe të marrin masat për koordinimin e shpërndarjes, në bazë të nevojave, pa dallim, për të gjithë banorët në zonat e rrethuara nga uji", tha Xhaçka.