Testohen sportelet në Rrugën e Kombit, ja pagesat për motorët deri te kamionët
Javën e ardhshme pritet aplikimi i tarifave nga 2.5 deri në 22.5 euro Gjiknuri: Koncesionari do ta mirëmbajë autostradën
Prej ditës së djeshme çdo automjet që do të kalojë nga Rruga e Kombit do të paguajë një taksë që varion nga 2.5 euro për motorët deri në 22.5 euro për kamionët e rëndë. Dje në mesditë u testuan sportelet, të cilët do të shërbejnë për pagesën e taksës së Rrugës së Kombit. Janë bërë gati 4 sportele, nga dy për çdo kah të lëvizjes, të cilat koncesionari ka nisur t'i testojë nga ana teknike. Kjo do të vazhdojë deri javën e ardhshme, e rreth mesit të prillit pritet të nisë edhe pagesa. Një vendim i tillë ka sjellë mjaft reagime, veçanërisht të banorëve të zonës apo të shoferëve të furgonëve apo autobusëve, që e bëjnë çdo ditë atë rrugë. Nga ana e saj, Ministria e Infrastrukturës ka sqaruar opinionin lidhur me vendosjen e tarifës për të kaluar në Rrugën e Kombit. Në një deklaratë për mediat, Ministria e Infrastrukturës shpjegon se për çfarë do të shërbejë kjo taksë dhe si do të funksionojë. "Në marrëveshjen e koncesionit, datë 6.12.2016 ' Për ndërtim, përmirësim, shfrytëzim, mirëmbajtje të autostradës Milot- Morinë', miratuar me VKM nr. 870, datë 14.12.2016 ' Për miratimin e kontratës se koncesionit, ' Për ndërtimin, përmirësimin, shfrytëzimin dhe mirëmbajtjen e autostradës MilotMorinë", ndërmjet Republikës se Shqipërisë, të përfaqësuar nga Ministria e Transportit dhe Infrastrukturës dhe Konsoriumit "Catalyst Viva Das General Contracting, LLC- Salillari shpk - Bee Tech- Violiap Ateve - Kastrati sh. a., ndër të tjera parashikohet se: koncesionari përdor një shesh me dy kahe për pagimin e taksës në afërsi të tunelit të Thirrës dhe koncesionari mbledh dhe mban të ardhurat nga taksa e rrugës. Objektivi kryesor i këtij projekti koncesion/ PPP i punimeve dhe shërbimeve është përmirësimi i autostradës dhe shfrytëzimi dhe mirëmbajtja efikase e saj. Koncesionari do të përmirësojë, operojë dhe mirëmbajë autostradën sipas një pakete të paracaktuar të standardeve të performancës për një periudhë 30- vjeçare të koncesionit. Taksa e rrugës karakterizohet dhe taksohet sipas përllogaritjes se klauzolës se kontratës së koncesionit, në varësi të klasës së automjetit në bazë të klasifikimit të automjeteve", thuhet në deklaratën e ministrisë. Tarifat e miratuara janë motor 2.5 euro, veturat e vogla 5 euro, autobusë dhe kamionçina 11.2 euro, kamion i mesëm 16.2 euro dhe kamion i rëndë 22.5 euro.
KONTRATA
Koncesionari i përbërë nga një kompani turke dhe 2 shqiptare është në vitin e dytë të kontratës, ku pritet fillimi i tarifimit. Sipas kontratës, përveç traut të pagesave, koncesionari duhej të kryente disa investime në dy vitet e para. "Top Channel" ka siguruar kostot e këtyre punimeve, të cilat nuk janë botuar në Fletoren Zyrtare. Sipas të dhënave, investimi për 2 vitet e para shkon rreth 18 milionë euro. Por kur kanë mbetur më pak se 9 muaj nga afati final për kryerjen e investimeve, koncesionari ka përfunduar vetëm sheshin ku drejtuesit e automjeteve paguajnë taksën për çdo kalim në tunel. Ura mbi lumin Drin duhet të rehabilitohet në 2 vitet e para, ndërkohë që deri tani nuk është kryer asnjë punim. Aktualisht, koncesionari po investon rreth 936 mijë euro në rrethimin e autostradës, për ta mbrojtur në dy akset e saj nga rrëshqitja e gurëve. Sipas kontratës, koncesionari do të nisë të marrë subvencion nga shteti për trafikun e munguar që në vitin e parë të vendosjes së pagesës. Qeveria e garanton privatin që nëse nuk siguron rreth 8 milionë euro vitin e parë, të paguajë diferencën e mbetur. Progresioni vazhdon rritës çdo vit, deri në 14 milionë euro. Përveç subvencionimit, privati do të përfitojë rregullisht taksën e tunelit, për 30 vjet. Sipas studimit të fizibilitetit të IFC, në Rrugën e Kombit kalojnë mesatarisht 5000- 6000 automjete në ditë dhe në një përllogaritje me tarifën minimale 5 euro, koncesionari do të arkëtojë nga 10 milionë euro vitin e parë, deri në 17 milionë euro vitin e fundit. Kurse zyrtarisht sipas kontratës, në total pas 30 vitesh, koncesionari arkëton nga tarifa e kalimit në tunel minimalisht 336 milionë euro.