Ndëshkohet Assad, 105 raketa bien në Siri
SHBA, Britania e Madhe dhe Franca udhëheqin sulmin ushtarak. Nikki Haley: Jemi gati të godasim prapë Presidenti Trump: Shkatërruam objektet e programit për armët kimike
Këshilli i Sigurimit i Kombeve të Bash kuara zhvilloi një takim urgjent të thirrur nga Rusia, e cila ka propozuar një rezolutë ku dënohen goditjet e ndërmarra nga tre aleatë perëndimorë ndaj objektivave siriane.
Ambasadorja amerikane në OKB, Nikki Haley tha se Shtetet e Bashkuara janë të gatshme të vazhdojnë presionin ndaj regjimit sirian, nëse Siria bën marrëzinë të kryejë sulme të tjera me armë kimike. "Koha e fjalëve mbaroi mbrëmë. Amerika qëndron në gatishmëri. Kur presidenti ynë cakton vijën e kuqe, ai e zbaton".
Ambasadori rus në OKB akuzoi Shtetet e Bashkuara për huliganizëm në politikën e jashtme dhe për shkelje të rëndë të ligjit ndërkombëtar.
Pentagoni deklaroi se operacioni i ndërmarrë në Siri ka goditur me sukses objektivat e synuara me qëllimin për të dobësuar kapacitetet e armëve kimike të regjimit
Shtetet e Bashkuara, Franca dhe Britania ndërmorën sulme ajrore të shtunën në mëngjes, duke lëshuar 105 raketa mbi tri objekte siriane të armëve kimike, një në Damask, dy të tjerë pranë Homsit në afërsi
të kufirit me Libanin.
Zyrtarët ushtarakë amerikanë thanë se të gjitha raketat goditën objektivat pak minuta njëra pas tjetrës, duke i shkatërruar objektet.
"Kemi goditur zemrën e programit sirian të armëve
kimike," tha Gjeneral Lejtnanti në një konferencë për shtyp të shtunën në Pentagon. Presidenti Donald Trump vlerësoi rolin e Britanisë dhe Francës për angazhimin në operacionet e bashkërenduara ajrore mbi
Siri. Zoti Trump postoi para pak orësh një koment në Twitter ku shkruan se u realizua një goditje e ekzekutuar në mënyrë perfekte dhe falënderon dy vendet aleate si dhe forcat e armatosura amerikane. Presidenti kish-
te paralajmëruar se Shtetet e Bashkuara do të përgjigjeshin ndaj sulmit me armë kimike të javës së kaluar në Siri. Mbrëmë Donald Trump iu drejtua amerikanëve me një fjalim të drejtpërdrejtë ku njoftoi vendi- min për të goditur objektiva të ushtrisë siriane: "Pak më parë u dhashë urdhër forcave të armatosura të Shteteve të Bashkuara të ndërmarrin goditje të përqendruara tek objektiva që kanë lidhje me kapacitetet për sulme kimike të Presidentit sirian Bashar al- Assad",- tha Presidenti Trump. Presidenti Trump iu drejtua vendit mbrëmë me një fjalim të transmetuar përmes televizionit dhe medias sociale, pak sekonda para se të fillonin goditjet ajrore, që tronditën me shpërthime dhe gjëmime të zhurmshme Damaskun.
Administrata i prezantoi goditjet si një veprim që synon t'i japë një mesazh të qartë regjimit të Presidentit sirian Bashar al- Assad për sulmin me armë kimike ndaj civilëve të zhvilluar javën e kaluar, si dhe për të parandaluar sulme të tilla në të ardhmen.
"Është e qartë se regjimi i Assadit nuk e mori mesazhin vitin e kaluar. Këtë radhë, ne dhe aleatët goditëm më fort. Së bashku i dërguam një mesazh të qartë Assadit dhe ithtarëve të tij vrastarë se nuk duhet të zhvillojnë të tjera sulme kimike, për të cilat do të mbajnë përgjegjësi",- tha Sekretari Mattis.