Ministria e Arsimit: UT në kaos, dëm financiar dhe shkelje ligji
Raporti "nxin" Mynyr Konin: Ja problematika në Universitetin e Tiranës "Rektori, mosmarrëveshje pothuajse me të gjithë"
Kaos në Universitetin e Tiranës, shkelje ligji dhe dëme financiare. Një fakt i tillë konfirmohet në raportin e Ministrisë së Arsimit dhe Sportit i publikuar edhe nga "Balkanweb".
Konkluzionet janë nxjerrë nga një grup pune i përbërë nga Alqi Kushi, Mirela Bimo, Jeton Shehu, Iva Beliu dhe Bledar Biçoku, të cilët kanë konstatuar se në Universitetin e Tiranës ka "problematika të administrimit të brendshëm, kryesisht nëpërmjet bllokimit të procedurës së brendshme të protokollimit, delegimit dhe vulosjes se praktikave shkresore, duke sjellë konfuzion në ushtrimin e funksioneve nga të gjitha organet dhe autoritetet drejtuese të këtij institucioni".
Grupi i punës ka konstatuar, gjithashtu, shkarkime të stafit të UT- së të kryer në kundërshtim me ligjin.
Po ashtu raporti thekson se Rektori Mynyr Koni ka mosmarrëveshje pothuajse me të gjithë administratën, përfshirë drejtuesit e njësive kryesore, ish- kancelarin dhe administratorin e ri.
PRECEDENTET
Pak kohë më parë, përplasja për kompetencat ligjore mes rektorit Mynyr Koni dhe kancelarit apo administratorit të përkohshëm të Rektoratit të Tiranës, Robert Skënderi, ka përfunduar në Ministrinë e Arsimit. "Lufta" me shkresa mes rektorit dhe kancelarit, ka sjellë pasoja në mbarëvajtjen e punëve në rektoratin e UT.
Sipas bordit të administrimit në kundërshtim me ligjin, Rektori ka pezulluar kancelarin nga detyra dhe i ka hequr disa herë të drejtën e protokollit dhe për më shumë se dy muaj e ka lënë jashtë institucionit. Si pasojë e kësaj përplasje, 65 punonjës të rektoratit nuk kishin marrë pagat prej 2 muajsh.
Administratori i përkohshëm deklaroi asokohe se pagat nuk kishin kaluar, pasi ai kishte përjashtuar nga borderotë rreth 10 punonjës dhe kjo gjendje do të vazhdojë derisa të sqarohet edhe pozicioni i tyre juridik.
Sipas tij në këtë kategori janë, tre punonjës të shkarkuar nga ai me urdhër të bordit, tre punonjës të emëruar nga rektori Koni. Kjo në shkelje të ligjit, pasi janë komanduar nga rektori, i cili është jashtë ko- mpetencave të tij. Ndërsa 2 punonjës të tjerë janë pushuar po nga rektori, sërish jashtë kompetencave.
Për shkak të këtyre 10 personave mbahen peng edhe 65 punonjës të tjerë pa u paguar. Rektori Koni me anë të një shkrese drejtuar shefes se Financës, e urdhëron të mos pranojë kalimin e asnjë borderoje që nuk i vjen e miratuar nga drejtoresha e burimeve njerëzore. Në të kundërt do të merren masa administrative ndaj saj. Sipas Kancelarit kjo shkresë është në shkelje të ligjit dhe tejkalim të kompetencave, ndërsa drejtoresha e burimeve njerë- zore është e shkarkuar prej tij nga detyra në vijim të urdhrave të bordit të administrimit.
Kancelari Skënderi u shpreh asokohe se kjo ishte arsyeja që pagat nuk kanë kaluar ende dhe se në këtë moment duhet të ndërhyjë ministria përgjegjëse për të zgjidhur këtë situatë, i dorëzuar përpara kësaj paligjshmërie që ka mbërthyer institucionin.