Negociatat me BE, Merkel: Ka ende disa parakushte deri në qershor
Kryeministri pritet nga Kancelarja gjermane: Vendimi i Berlinit në javët që vijnë Rama: Kemi bërë reforma, Shqipëria nuk duhet të humbasë kohë
Kancelarja gjermane Angela Merkel inku rajon Shqipërinë të plotësojë edhe disa kushte të tjera, para vendimit të qershorit. Gjatë takimit në Berlin, me kryeministrin shqiptar Edi Rama, Kancelarja tha se Shqipëria ka bërë reforma të rëndësishme, siç është reforma në drejtësi, ndërsa shprehu mbështetjen e saj për më tej, por pa deklaruar qartë mbështetjen e Gjermanisë në vendimin e qershorit, në Këshillin Evropian. Gjatë konferencës së përbashkët, Kancelarja Angela Merkel u shpreh: "Unë mendoj se të dy duhet të falënderojmë shumë presidencën bullgare, e cila kujdeset në mënyrë të pabesueshme shumë për çështjet thelbësore të rajonit, çka ka çuar në atë që të kemi një rritje të vazhdueshme të vizitave të politikanëve europianë drejt rajonit. Ne do të këshillohemi se si do të operojmë më tej në procesin e të ardhmes europiane të Shqipërisë. Ju e dini se ne jemi të bindur se të gjithë shtetet e Ballkanit Perëndimor duhet të kenë një perspektivë europiane, që edhe ato një ditë të mund të bëhen anëtare të Bashkimit Europian". "Komisioni më 17 prill ka propozuar që të mund të nisin negociatat e anëtarësimit me Shqipërinë. Për këtë, ne do duhet të konsultohemi me Këshillin Europian në fund të qershorit. Që të mund të hapen negociatat e anëtarësimit ka një sërë parakushtesh. Shqipëria disa i ka plotësuar fort. Ka parakushte të caktuara për hapjen e negociatave të anëtarësimit. Gjatë javëve të ardhshme, ne do të krijojmë mendimin tonë përfundimtar, nëse ka akoma disa gjëra që duhen realizuar, apo a është bërë përparim i mjaftueshëm. Për këtë do të flasim edhe me kolegët tanë europianë", - tha Merkel. Merkel shtoi se takimi i djeshëm me Ramën ishte shumë i rëndësishëm për të mësuar se si i sheh ai plotësimin e parakushteve të ndryshme dhe se si Gjermania do të mundë që në këtë rast ta mbështesë Shqipërinë në realizimin e reformave. "Këtë e kemi bërë e do të vazhdojmë ta bëjmë edhe më tej.
Unë dua ta them shprehimisht se Shqipëria ka bërë reforma të rëndësishme dhe se nëpërmjet tyre janë arritur përparime", u shpreh
Merkel. "Kemi folur edhe në takimin e fundit për këto, si për shembull, këtu e kam fjalën për sistemimin e drejtësisë, sepse nëpërmjet reformës në drejtësi, forcohet tërë integriteti dhe besueshmëria e tij. E dimë se procesi i vetingut tani po zgjerohet edhe në polici. Unë vetëm se mund të inkurajoj kryeministrin dhe të vazhdojë këtë rrugë", - tha Merkel. "Gjermania do të jetë ndihmuese, në mënyrë që të shohim vërtetë përparimet që na duhen në mënyrë që në qershor të marrim një vendim",- theksoi Kancelarja.
KRYEMINISTRI
Nga ana e tij, kreu i qeverisë shqiptare u shpreh: "Sot jam krenar që edhe falë mbështetjes së Gjermanisë, vij këtu, pasi Shqipëria ka kryer një reformë të thellë të drejtësisë, e cila konsiderohet nga Komisioni Europian, qoftë në Paketën e Zgjerimit, qoftë në Raportin e fundit të Progresit, si një model për t'u shtrirë edhe në vendet e tjera të Ballkanit Perëndimor, përfshirë dhe vendet që janë aktualisht duke negociuar e ndërkohë, ne kemi nisur me rezultate shumë inkurajuese zbatimin e ligjit të vetingut". "Për këto dhe për plotësimin e të gjitha detyrave të shtëpisë në këtë fazë të parë të procesit, kemi marrë rekomandimin pozitiv, pa kushte, nga Komisioni Europian për çeljen e negociatave dhe unë shpresoj shumë se do të marrim dhe mbështetjen e Gjermanisë dhe të Kancelares në qershor", - theksoi Rama. Po ashtu Rama tha se "ne e dimë fare mirë se ky nuk është fundi. Ky është vetëm momenti i mbylljes së një faze dhe hapjes së një faze të re. Ka shumë reforma, shumë ndryshime dhe shumë sakrifica që duhen bërë për ta merituar një ditë anëtarësimin në Bashkimin Europian. Por, njëkohësisht, unë kam ardhur këtu për t'i përcjellë Kancelares bindjen time se Shqipëria nuk duhet të humbasë kohë dhe energji në pritje të çeljes së negociatave, sepse e ka merituar këtë dhe, sepse, duke u bërë pjesë e grupit të vendeve që po negociojnë në rajon, ne hyjmë në një fazë ku, siç e thashë, kemi jashtëzakonisht shumë për të bërë, ku marrim një energji të re dhe një mbështetje të madhe të të gjithë shqiptarëve, në një proces ku shqiptarët e shohin veten të lidhur me të ardhmen e tyre".