Spiropali: Ende ka parazitë dhe grabitqarë në zyrat e shtetit
Kryeministri: Erisa nuk bëri detyrat e saj
Kryeministri Edi Rama kritikoi dje deputeten Elisa Spiropali, me pretendimin se nuk ka bërë detyrën e saj si koordinatore e bashkëqeverisjes me qytetarët. "Unë prisja nga Elisa Spiropali të thoshte gjërat për të cilat është zgjedhur, koordinatore e bashkëqeverisjes. Dhe prisja nga Elisa Spiropali të thoshte se cilët kryetarë bashkie duhet të shkarkohen sot për faktin që nuk duan t'ia dinë fare. Si mundet që sot pas 6 muajsh ne kemi ende bashki ku kryetarët e bashkisë ende nuk kanë marrë vesh se çfarë duhet të bëjnë. Deputetët nuk janë zyra pune. Elisa nuk e bëri, sepse nuk ka bërë detyrën si duhet. Shpresoj që ta bëjë",tha Rama. Por vet koordinatorja kombëtare për bashkëqeverisjen në PS, Elisa Spiropali deklaroi nga Asambleja e PS se shumica e kryetarëve të bashkive nga PS kanë raportuar në mënyrë fiktive të dhënat për anëtarësinë. Për sa i përket problemeve në administratë, ajo shtoi se ka ende grabitqarë, që duhet të largohen. "Ende ka parazitë dhe grabitqarë në zyrat e shtetit, duhet t'i shkulim me rrënjë. 66 largime nga detyra deri tani, procesi vijon. Shumë kryetarë të bashkive të PS raportojnë në mënyrë fiktive për anëtarësinë. 7 bashki ende nuk kanë hapur zyrat e bashkëqeverisjes, pa zyrë Rrogozhina, Shijaku, Këlcyra, Dropulli, Himara, Pusteci dhe Skrapari",- tha Spiropali. Më tej koordinatorja për bashkëqeverisjen, akuzoi opozitën para asamblesë së PS- së se vizioni i opozitës është çadra dhe mjeti çizmja duke kujtuar protestën e PD- së si dhe sulmin e kryetares së LSI- së Monika Kryemadhi ndaj kryeministrit Edi Rama në seancën ku u zgjodh kryeprokurorja. "Vizioni i tyre është çadra dhe mjeti është çizmja. I kanë dhënë shenjat se nuk kanë asnjë strategji. Përballë kësaj mësymje ka vetëm një aleat, bashkëqeverisje në çdo cep të ter- ritorit", u shpreh Spiropali. Koordinatorja për bashkëqeverisjen drejtoi kritika edhe ndaj krerëve të degëve, për të cilët tha se shpesh bëjnë raportime fiktive. Sipas Spiropalit kjo platformë duhet parë si një mënyrë për të shembur muret e shurdhëta e të verbëra që na ndajnë nga njerëzit.