ISHTI, 23 milionë lekë gjoba karburanteve në të gjithë vendin
Shkelin kushtet e sigurisë në pikat e shitjes
Inspektorati Sh tetëror Teknik dhe Industrial ( ISHTI) ka vendosur të paktën 24 masa administrative ndaj subjekteve gjatë tre muajve të parë të këtij viti. Muaji mars mban edhe numrin më të lartë të këtyre masave me 10 të tilla të cilat, në vlerë monetare, llogariten në rreth 23.2 milionë lekë. Dy muajt e tjerë, janar dhe shkurt, kanë respektivisht 9 dhe 5 gjoba me një vlerë totale prej 10.5 milionë lekë. Kjo e çon totalin e tremujorit në 33.7 milionë lekë. Ajo që vihet re në inspektimet që janë kryer nga ana e këtij institucioni është zgjerimi i kontrolleve edhe në fab- rika, të cilat kanë në objekt të tyre përpunimin, por edhe prodhimin. Konkretisht në muajin mars, në fokus të kontrolleve kanë qenë pikërisht fabrikat e bulmetit, fasonet apo fabrika të prodhimit të pijeve. Tipikisht kontrollet e Inspektoratit Shtetëror Teknik dhe Industrial janë shtrirë kryesisht në karburante duke pasuar më pas edhe në restorante e hotele e lidhur kjo me kontrollin e rezervuarëve të gazit si dhe instalimeve. Kjo e fundit më së shumti u vu re gjatë verës së vitit të kaluar pas një precedenti të ndodhur në Velipojë. Por cilat janë arsyet për të cilat Inspektorati Shtetëror Teknik dhe Industrial ka marrë masa ndaj subjekteve private. Referuar shpjegimeve dhe referencave ligjore të bëra transparente nga ky institucion ar- syet janë të ndryshme duke nisur që nga mungesa e licencave të nevojshme për të kryer një aktivitet të caktuar, tek mungesa e dokumentacionit të nevojshëm për ushtrim aktiviteti apo edhe mosrespektim të kërkesave ligjore që lidhen me sigurinë në punë të punonjësve, dhe instalimet teknike që nuk përmbushin standardet e kërkuara. Lidhur me inspektimet në karburante janë një seri rastesh që janë gjobitur pasi produktet e tregtuara prej tyre nuk përmbushin kërkesat e cilësisë duke pasur shmangie nga treguesit pikë të flakërimit. Këto të fundit janë gjobitur në vlerat 150 deri në 200 mijë lekë kurse rekordin e mban masa administrative ndaj një subjekti që ka ushtruar aktivitetin në përpunimin e mbetjeve vajore duke mos pasur licencë për këtë aktivitet. Ndaj këtij subjekti masa është 15 milionë lekë.