Integrimi i Shqipërisë në BE, Sourani: Greqia mbështet përshpejtimin e procesit

Ambasadorja

e Greqisë në Shqipëri, Eleni Sourani shprehu dje, mbëhstetjen e vendit që përfaqëson për integrimin e Shqipërisë në BE. Gjatë fjalës përshëndetëse në aktivitetin përmbyllës të projektit të binjakëzimit "Fuqizimi i mëtejshëm i Kuvendit të Shqipërisë në kuadër të anëtarësimit në Bashkimin Europian", financuar nga BE, Sourani tha se vendet anëtare, por sidomos vendet fqinje si Greqia dhe Italia kanë dhënë gjithmonë mbështetjen e tyre për përshpejtimin e procesit integrues. Dimitrios Vasileiou, Këshilltar Rezident i Binjakëzimit nga Parlamenti grek, njëherësh dhe moderator i saj vuri në dukje rëndësinë e projektit, i cili sipas tij synon të rrisë efikasitetin, përgjegjësinë, dhe transparencën e Kuvendit të Shqipërisë në procesin e integrimin në Bashkimin Europian. Në fjalën e saj në këtë aktivitet, zëvendëskryetarja e Kuvendit të Shqipërisë, Vasilika Hysi, u shpreh se "në tërësi, projekti ka forcuar bashkëpunimin midis Shqipërisë dhe Europës në menaxhimin e financave publike". Gjatë fjalës së tij, ambasadori italian, Alberto Cutillo, përgëzoi anëtarët e Parlamentit dhe ekspertët nga Greqia, Shqipëria, Italia, Rumania dhe Kroacia, për përfshirjen në realizimin e projektit. Ndërsa Monika Bylaite, shefe e Seksionit Politik, Ekonomik dhe Informacionit, Delegacioni i BE në Shqipëri, u shpreh: "Roli i parlamentit, si nga ana politike, edhe administrative do bëhet edhe më i rëndësishëm në momentin që Shqipëria do i afrohet edhe më tej Bashkimit Europian."