Veliu: Me Agron Xhafajn trafikuam drogë, nuk kishim frikë nga policia
Trafiku i drogës, PD zbulon identitetin e dëshmitarit të vëllait të ministrit të Brendshëm "Shefi i Krimit në Vlorë më kërcënoi djalin"
Partia Demokratike publikoi dje videodëshminë dhe identitetin e dëshmitarit X, i cili quhet Albert Veliu. Ai rrëfeu se si e ka njohur dhe ka bashkëpunuar me vëllain e ministrit të Brendshëm, Fatmir Xhafaj, Agron Xhafaj në trafikun e drogës në Itali. I cilësuar si dëshmitari X, Veliu solli dëshmi të forta kundër vëllait të ministrit të Brendshëm, Fatmir Xhafajt, teksa konfirmoi se një nga zërat është i vëllait të ministrit. Veliu tha se vëllain e Fatmir Xhafajt nuk e përgjoi ai, por është zëri i tij. Sipas Albert Veliut, Agron Xhafaj e braktisi në kohën kur ai vuajti dënimin në 7 vite burg në Itali në vitin 2005 kur u kap me 12 kg kokainë. Dëshmitari tregoi se gjatë takimit që ka pasur me Agron Xhafajn para 4 muajsh në Vlorë i ka kërkuar këtij të fundit një favor për ta vënë në provë. Sipas tij, Agron Xhafajt i kërkoi se donte të bënte një rrugë transporti me kanabis për në Itali dhe Agron Xhafaj e ka drejtuar për tek ' Ermali', i cili thuhet se është shef kufiri. "Quhem Albert Veliu, 51 vjeç. Kam qenë në Itali, kam punuar tërë jetën në det, ' 93' 99. Në 2000 isha në Itali me grupin e Agron Xhafaj, deri në vitin 2002. Shisja kokainë në Itali. Agron Xhafajn e njoh që në ' 99- ën që me anë të një mikut tim, me Ardin e Refatit që sot ndodhet brenda, në Brindisi, në Itali",theksoi ndër të tjera dëshmi- tari X, që tashmë ka identitet. Ai tha se nuk e kishte kryer trafikimin e drogës drejt Italisë siç flitej në videoregjistrimin me Agron Xhafajn. "Kur rashë në burg nuk më solli një paketë cigare. E takova për t'i kërkuar ndihmë për të çuar hashash në Itali. Agroni më çoi te Ermali. Agroni komandon Vlorën. Atë punë ka bërë, e bën edhe tani. Ka miqtë e tij që hedhin mall në Itali",- tha Albert Veliu duke shtuar se sipas bisedës, ai do të trafikonte për në Itali 100 kg drogë. Veliu tha se pas publikimit të hënën të videopërgjimit me Agron Xhafajn, policia ka bërë presion ndaj familjes së tij. "Shefi i Krimeve i ka shkuar djalit tim në punë 30 minuta pas publikimit të hënën. Emri i dëshmitarit i është treguar policisë nga Agron Xhafaj. I kanë shkuar djalit të puna duke i kanë thënë do të ruajmë babanë. Kam marrë kërcënime",- tha Veliu. Teksa tregoi detaje se si bëhej trafiku i drogës përmes bregdetit të Vlorës, ku si kokën e trafikut akuzon vëllain e Xhafaj, Veliu pohon se rrugët ishin të lira dhe askush nuk kishte frikë nga policia, duke nënkuptuar kështu mbrojtjen që kishte Agron Xhafaj. "Do i blija me lekë borxh për mallin. Ata e kishin gomonen, unë nuk jam padrino, jam hallexhi. Rrugët ishin të zgjidhura, ishin të gjitha të hapura, s'kisha frikë nga policia. Ai më tha se do takosh Ermalin, nuk e di ça ka qenë, shef kufiri",- rrëfeu Albert Veliu.