Aleksandër Vuçiç: Pavarësia e Kosovës, e pashmangshme
Janjiç: Zgjidhja e çështjes së Kosovës nuk hap automatikisht dyert e Bashkimit Europian “KE na ka vënë kusht arritjen e një marrëveshjeje”
Në një intervistë për të përditshmen serbe ' Novosti' presidenti i Serbisë, Aleksandër Vuçiç la të kuptohet se ka nisur ta pranojë se pavarësia e Kosovës është e pashmangshme. Vuçiç shprehet pesimist se nga dialogu me Prishtinën mund të dilet në një zgjidhje tjetër veç pavarësisë, të cilën sipas tij e ka përcaktuar Perëndimi. Vuçiç pranon se zgjidhja përfundimtare do të jetë e dhimbshme për serbët dhe se për këtë duhet një konsensus i gjerë shoqëror në Serbi. "Është e vështirë të dalim me një propozim të ri, sepse fuqitë e mëdha perëndimore kanë vendosur si bazë faktin që çështja territoriale e Kosovës është zgjidhur, duke i dhënë pavarësinë. Dhe prej kësaj ata nuk heqin dorë. Duhet të përpiqemi të shohim se çfarë mund të përfitojmë, jo vetëm për serbët në Kosovë, por edhe për ata në Serbi. Një marrëveshje ligjërisht e detyrueshme duhet të ketë konsensus të gjerë në shoqërinë tonë. "Megjithatë presidenti serb vlerëson se zgjidhja e çështjes së Kosovës është mbi të gjitha në interes të Serbisë dhe nuk pranon që me të të bëhet pazar në këmbim të anëtarësimit në Bashkimin Europian. Ndërkohë me strategjinë e re të zgjerimit, Komisioni Europian u ka vënë kusht të pashmangshëm Kosovës dhe Serbisë, arritjen e një marrëveshjeje për normalizimin e raporteve, në mënyrë që të dyja shtetet të ecin drejt pro- ceseve integruese. Një marrëveshje e tillë, është parashikuar të arrihet gjatë vitit 2019. Kjo fazë e dialogut, në Prishtinë po shihet si pjesa finale e negociatave. Dialogu, zhvillohet në dy nivele, atë politik, ku delegacionet përfaqësohen nga presidentët e shteteve apo kryeministrat, dhe niveli teknik, që zhvillohet përmes ekipeve të ekspertëve, ministrave dhe përfaqësuesve të institucioneve nga të dyja shtetet. Sakaq, Dushan Janjiq, themelues i Forumit për Marrëdhënie Etnike në Beograd është shprehur se nuk është i saktë qëndrimi i qeverisë në Serbi se me zgjidhjen e çështjes së Kos- ovës, dyert e Bashkimit Europian për Serbinë do të hapen automatikisht. "Një gjë e tillë nuk do të ndodhë pa zbatimin e kapitujve 23 dhe 24 për pakicat, të drejtat e njeriut dhe sundimin e së drejtës, me të cilët hapet dhe mbyllet procesi i anëtarësimit në BE. Rekomandimi ynë për autoritetet është që të fillojnë të punojnë në rregullimin ligjor dhe të zbatojnë dispozitat mbi të drejtat e pakicave kombëtare nëse duan të hyjnë në BE", tha Janjiq. Ndërkohë disa ditë më parë ka reaguar dhe Bekim Blakaj, drejtor ekzekutiv i Fondit për të Drejtën Humanitare në Kosovë ku është shprehur në një intervistë se lidershipi politik në Kosovë dhe në Serbi më tepër janë të angazhuar në vendosjen e marrëdhënieve normale në mes dy shteteve, sesa për një pajtim ndërmjet dy popujve. Mendoj që politikanët, udhëheqësit politikë, mund të ndikojnë jashtëzakonisht negativisht në krijimin e njëfarë narracioni tek populli, të cilin e përfaqësojnë këta politikanë, sepse, nëse këta shfrytëzojnë një gjuhë të urrejtjes, atëherë gjithsesi që kjo do të reflektojë edhe te qytetarët"- është shprehur Blakaj.