Emigrantët nga Lindja, Bushati: Nuk mund të kapërcejmë kapacitetet, jemi të gatshëm
Ministri
për Evropën dhe Punët e Jashtme, Dimtir Bushati deklaroi dje se beson se në fund të këtij muaji Këshilli i Bashkimit Europian do t'i hapë një perspektivë të qartë Shqipërisë. Bushati pati dje një interpelancë me një grup studentësh sa i përket temës së negociatave. "Shqipëria - tha ai - është gati për t'u ulur në tryezën e bisedimeve për anëtarësim në Bashkimin Europian, pasi ka përmbushur të gjitha detyrimet për këtë fazë të procesit. "Ne synojmë të ulemi në tryezën e bisedimeve dhe të hapim një kapitull të ri në marrëdhëniet me BE- në, që nuk do të mbyllet nesër, por do të ketë përpara sfida", - tha Bushati. Ndërkohë, në një intervistë për "ABC News", Bushati deklaroi se për çështjen e emigrantëve, "Shqipëria nuk mund të kapërcejë kapacitetet e saj, në përballimin e situatës së emigranteve nga Lindja e Mesme, pavarësisht situatave gjeopolitike". Mes të tjerash, ai tha se qeveria shqiptare është e gatshme të përgjigjet, bazuar tek solidariteti dhe proporcionaliteti në këtë situatë. Më herët, gjatë interpelancës, ai theksoi se, "vendet anëtare do të mblidhen në formatin e ministrave të Jashtëm në 25 qershor dhe në formatin e kryeministrave në 28 qershor, kur pritet edhe marrja e një vendimi". Ministri tha se reformat e bëra, veçanërisht ajo në drejtësi, krijoi besueshmëri te Komisioni Evropian. Duke folur për opozitën, Bushati tha se është për të ardhur keq që opozita ka vendosur bast kundër integrimit. "Nuk besoj se ka forca politike që e kundërshtojnë projektin europian, por ka aktorë politikë që nuk kanë lënë gjë pa bërë për ta kundërshtuar zbatimin e reformës në drejtësi", - tha Bushati. Kreu i diplomacisë shqiptare theksoi se, "… vendimmarrja e BEsë nuk është as për qeverinë dhe as për Ramën". "Është për të ardhur keq që opozita shqiptare ka vendosur një bast dhe ka një ton ultimativ, a thua se në 28 qershor merr fund çdo gjë dhe në 29 qershor nuk lind më dielli në Shqipëri", - tha Bushati. Sipas tij, "… ky është një proces që prek të gjithë shqiptarët, ndaj është për të ardhur keq që opozita po përjashtohet nga kontributi që forcat politike kanë në këtë proces".