Meta me kreun e Bundestagut: Çelja e negociatave, sinjal pozitiv në rajon
Presidenti, i ftuar nderi në Takimin e 23- të Ndërkombëtar të Berlinit "Jemi të vetëdijshëm për punët e mëdha që duhet të bëjmë"
Presidenti i Republikës, Ilir Meta u prit dje, nga Presidenti i Bundestagut të Gjermanisë, Dr. Wolfgang Schäuble. Presidenti Meta shprehu mirënjohjen e thellë për ndihmën dhe mbështetjen e gjithanshme që Gjermania i ka dhënë Shqipërisë dhe shqiptarëve, 30 vite bashkëpunim diplomatik dypalësh. Në mënyrë të veçantë, Presidenti Meta vlerësoi rolin dhe angazhimin e Gjermanisë në drejtim të integrimit të Shqipërisë dhe vendeve të tjera të Ballkanit Perëndimor në Bashkimin Europian. Duke iu referuar progresit të bërë në përmbushjen e prioriteteve kyçe, Presidenti Meta theksoi rëndësinë e jashtëzakonshme që do të kishte një vendim pozitiv i Bundestagut gjerman në favor të çeljes së negociatave të anëtarësimit me Shqipërinë dhe Maqedoninë. "Çelja e negociatave vetëm do të na ndihmonte më shumë për të adresuar më mirë të gjitha prioritetet dhe përmbushur standardet dhe kriteret e nevojshme, si dhe do të jepte një sinjal shumë pozitiv për të gjitha forcat në rajon", - nënvizoi Presidenti Meta. Gjatë takimit u vlerësua premtuese dhe inkurajuese marrëveshja mes qeverisë greke dhe asaj maqedonase për zgjidhjen e çështjes së emrit të Maqedonisë dhe u theksua rëndësia e përfundimit të fazës finale të dialogut Kosovë- Serbi. Të dy bashkëbiseduesit ndanë shqetësimin për çështjet e sigurisë që kërcënojnë rajonin e Ballkanit Perëndimor dhe theksuan nevojën e një bashkëpunimi më të ngushtë në këtë drejtim, si në nivel dypalësh ashtu edhe në atë rajonal e europian. Po dje, Presidenti i Republikës, Ilir Meta mori pjesë si i ftuar nderi i Bunde- stagut gjerman në Takimin e 23- të Ndërkombëtar të Berlinit. Gjatë fjalës në këtë aktivitet, Kreu i Shtetit theksoi se, sot paqja dhe stabiliteti janë të pranishme në rajonin tonë dhe kemi mundësinë historike për ta bërë atë të pakthyeshme. Në këtë frymë bashkëpunimi dhe mirëkuptimi të ndërsjellë, vijoi më tej Meta, ne u lutëm bashkërisht që çështja e emrit të Maqedonisë të zgjidhej sa më parë dhe falënderojmë Zotin për progresin historik të ditëve të fundit dhe finalizimin e saj. Po kështu u lutëm që dialogu ndërmjet Kosovës dhe Serbisë të përparojë drejt një zgjidhjeje përfundimtare të pranueshme për të dyja vendet, - nënvizoi Presidenti. Duke iu referuar temës së takimit, Presidenti Meta nënvizoi, gjithashtu, se pavarësisht izolimit të gjatë komunist, uria e shqiptarëve për dashurinë dhe përkushtimin ndaj Zotit ishte tejet e madhe. "Përpjekje satanike u bënë gjatë regjimit diktatorial për të reduktuar interesin e shqiptarëve vetëm tek "buka e përditshme" dhe zbrazur shpirtin e tyre nga besimi dhe dashuria në Zot. Nuk do të gjeja shprehje më të bukur se ajo e Nënë Terezës që thotë se: Uria për dashurinë është më e vështirë të largohet se sa uria për bukë",- u shpreh Meta. Presidenti Meta nënvizoi, gjithashtu, edhe progresin e bërë nga Shqipëria nën drejtim të procesit të integrimit evropian dhe theksoi se, vetëm dy javë na ndajnë nga vendimi i rëndësishëm që pritet të merret nga Këshilli Europian për çeljen e negociatave të anëtarësimit të Shqipërisë në Bashkimin Europian. "Ne lutemi që ky vendim të jetë pozitiv si për ne, ashtu edhe për fqinjin tonë Maqedoninë. Brenda kësaj lutjeje qëndron dhe vetëdija e plotë për punën akoma më të madhe që duhet të bëjmë për të rritur cilësinë dhe standardet në të gjitha fushat e politikbërjes. Çelja e negociatave do të ishte një shtysë inkurajuese për adresimin edhe më të fortë të prioriteteve kyçe",- theksoi Presidenti Meta.
Deklarata "Çelja e negociatave do të ishte një shtysë inkurajuese për adresimin edhe më të fortë të prioriteteve kyçe",- theksoi dje, Presidenti Meta, i cili u shpreh se shqiptarët janë të vetëdijshëm për punën e madhe që i pret në vijim.