Taulant Balla: Presidenti zgjodhi të mbajë farsën e opozitës me teatrin
Kryetari
i grupit parlamentar të PS- së, Taulant Balla akuzoi Presidentin e Republikës se zgjodhi të mbajë gjallë farsën e opozitës, duke mos dekretuar ligjin për godinën e Teatrit Kombëtar. Në një reagim të tij, Balla u shpreh: "Në 21 janar 2011, Lulzim Basha ministër i Brendshëm dhe Sali Berisha kryeministër akuzonin protestuesit dhe opozitën për grusht shteti. Sot, 7 vjet më pas, Lulzim Basha dhe Monika Kryemadhi, që të dy në opozitë, akuzojnë shumicën qeverisëse për grusht shteti. Me një gjuhë që nuk ka asnjë lidhje me aspiratat europiane të Shqipërisë së vitit 2018, kreu i opozitës kërcënoi me ruspa e dinamit sipërmarrësit shqiptarë dhe arkitektët e huaj". "Fatkeqësisht sot thirrjeve të Lulit e Monës iu përgjigj Presidenti i Republikës, i cili deri më sot ka pasur një sjellje të admirueshme, duke mos u bërë palë as e politikave të familjes së tij, as e lojërave të partisë së tij. Presidenti zgjodhi të mbajë gjallë farsën e opozitës me teatrin, të po të njëjtëve individë që protestonin kundër parkut të lodrave, kundër bulevardit të ri, kundër Rilindjes Urbane në çdo qytet të Shqipërisë", theksoi Balla. "Ai që javë më parë i bënte thirrje autoriteteve shtetërore të gjenin gjuhën me artistët sa i takonte projektit të teatrit, sot vendosi kundër vullnetit të artistëve, duke mbështetur lojën e opozitës. Shumica parlamentare, në mbështetje të dekretit të Presidentit dhe Kushtetutës, do të rivotojë projektligjin në fjalë menjëherë sapo parlamenti të rimblidhet në shtator për t'u dhënë shqiptarëve dhe artistëve një teatër të ri, modern dhe dinjitoz".
REAGIMI I PD
Partia Demokratike përshëndeti dje përmes zëdhënëses Ina Zhupa vendimin e Presidentit të Republikës, Ilir Meta, për rrëzimin e ligjit për shembjen e Teatrit Kombëtar. "Vendimi i presidentit është një provë tjetër se projekti për shembjen e Teatrit Kombëtar është një akt i paligjshëm i babëzisë së Edi Ramës, Erion Veliajt dhe mafies së ndërtimit, që nuk ka asnjë lidhje me nevojën për një teatër të ri", tha dje Zhupa.