Hahn: Përgatitja për negociatat të përfundojë brenda 14 muajve
Komisioneri i Zgjerimit, optimist për hapjen e negociatave në 2019- ën "Qëllimi, të marrim dritë të gjelbër nga të gjitha vendet në mesin e vitit"
Për komisionerin e Zgjerimit, Johanes Hahn nuk ka dyshime se negociatat për Shqipërinë dhe Maqedoninë duhet të hapen në mesin e vitit të ardhshëm. Në një intervistë për agjencinë e lajmeve të BE- së, "Politiko" ai u shpreh se Tirana dhe Shkupi kanë nisur tashmë procesin e përgatitjes për qershorin e 2019- ës. Hahn tha se është "shumë i bindur" se negociatat për Shqipërinë dhe Maqedoninë mund të fillojnë vitin e ardhshëm, duke vënë në dukje se procesi i verifikimit të gatishmërisë së vendeve për negociata ka filluar tashmë. "Kjo është një punë gjithëpërfshirëse dhe shpresoj se mund ta përfundojmë në një vit deri në 14 muaj. Qëllimi është të marrësh dritë të gjelbër nga të gjitha vendet në mesin e vitit". Sipas Johanes Hahn, anëtarësimi i vendeve të rajonit është një mision historik. "Gjithçka filloi në ' 89 me rënien e Perdes së Hekurt", tha ai. "Zgjerimi i madh në 2004 ishte... një pasojë e parë e madhe. Dhe unë do të thosha se e gjithë kjo është përfunduar vetëm kur të gjashta vendet të jenë anëtare të Bashkimit", u shpreh ai. Komisioneri i Zgjerimit u ndal edhe te Kosova, duke theksuar domosdoshmërinë e vijimit të dialogut mes Prishtinës dhe Beogradit, me qëllim që vendi të avancojë në rrugëtimin e integrimit europian. Një nga barrierat e mëdha të Kosovës ndaj anëtarësimit në BE është se ajo duhet të zgjidhë mosmarrëveshjet e saj me Serbinë, vendin nga i cili shpalli pavarësinë në 2008- ën. Hahn vuri në dukje se qeveria e Kosovës mbështetet gjithashtu në tarifat doganore për të ardhurat dhe kjo do të duhej të ndryshonte para se të mundte bashkohet me tregun e vetëm të BE- së. Në këtë intervistë, Hahn u kthye kundër pikëpamjes së Macron. Ai tha se qytetarët e vendeve të Ballkanit Perën-
dimor, "kanë të drejtë të bëhen anëtarë të BE- së dhe BE- ja përballet me një zgjedhje midis eksportimit të stabilitetit në rajon ose të paqëndrueshmërisë së importuar në bllok". Komisioneri i Zgjerimit deklaroi se pajtohet me presidentin francez, Macron që BE duhet të reformojë veten, por tha se kjo mund të ndodhë në të njëjtën kohë kur vendet e Ballkanit Perëndimor
zhvillojnë bisedimet e anëtarësimit. "Këndvështrimi im është ndoshta pak më ndryshe nga Presidenti Macron, ndoshta ne mund ta bindim atë që të dyja duhet të bëhen paralelisht", u shpreh Hahn. Planet aktuale të BE- së lënë dy vende të Ballkanit Perëndimor, Kosovën dhe Bosnjë dhe Hercegovinën pa as një afat kohor paraprak për bisedimet e anëtarësimit.