Trafikonin klandestinë në Angli dhe SHBA, arrestohen 9 persona dhe 2 në kërkim
Policia: Koka e grupit kriminal, Gazmend Garupi. Ja roli i pjesëtarëve të tjerë Pagesa për bandën e falsifikatorëve, 8- 12 mijë euro, realizonte martesa fiktive me shtetas bullgarë
Një grup kriminal që trafikonte klandes tinë shqiptarë në SHBA dhe Angli kundrejt pagesave që varionin nga 8 mijë deri në 12 mijë euro është shkatërruar nga policia e Shkodrës. Blutë në bashkëpunim me prokurorinë dhe Drejtorinë e Forcës Operacionale finalizuan me kujdes operacionin e koduar "Garantuesit", duke vënë në pranga 9 persona, ndërsa dy të tjerë janë shpallur në kërkim. Mësohet se grupi në fjalë mundësonte trafikun e klandestinëve përmes falsifikimit të pasaportave, kartave të identitetit italiane dhe greke, viza, leje drejtimi, karta studenti etj., dhe nga përdorimi i tyre mundësohej kalimi drejt Amerikës dhe Anglisë. Finalizimin e këtij operacioni e bëri të ditur përmes një deklarate për shtyp drejtori i Policisë Vendore të Shkodrës, Vehbi Bushati. "Gjatë operacionit u arrestuan 9 shtetas dhe janë shpallur në kërkim 2 të tjerë, të cilët vepronin si një grup i strukturuar kriminal, që merrej me trafik personash drejt Anglisë dhe SHBA, nëpërmjet një skeme që funksiononte në bazë të falsifikimit të dokumenteve të ndryshme të identitetit", bëri të ditur drejtori Bushati. Pas arrestimit të 9 shtetasve dhe shpalljes në kërkim të dy të tjerave, policia ka sekuestruar gjithashtu një laborator që shërbente për falsifikimin e dokumenteve si dhe prova të shumta materiale të kësaj skeme trafiku. Sipas burimeve të mësipërme, personat e arrestuar dyshohen se kanë konsumuar elementët e veprave penale si: "Ndihmë për kalim të paligjshëm të kufirit", "Prodhim i mjeteve për falsifikim të dokumenteve", "Falsifikim i vulave dhe stampave ose formularëve", "Falsifikim i letërnjoftimeve pasaportave ose vizave", "Falsifikim i dokumenteve shkollorë" dhe "Prodhim e shitje narkotikësh". Po të njëjtat
burime pohuan se grupi kriminal realizonte martesa fiktive me shtetase dhe shtetas bullgarë nëpër zyra të ndryshme të Gjendjes civile të Shqipërisë për t'u pajisur me dokumente, ndërsa më pas i shoqëronin deri në destinacionin final. Kreu i grupit ishte Gazmend Garupi, ndërsa Sotiraq Antoni dhe Haxhi Ramadani ishin bashkëpunëtorë.
PAGESAT PËR TRAFIKANTËT
Arrestimi i tyre është bërë në kuadër të procedimit
penal të vitit 2018, pasi nga tërësia e veprimeve hetimore të kryera rezulton se ky grup i mirorganizuar kryente veprimtari kriminale në drejtim të dhënies ndihmë për kalim të paligjshëm të kufirit drejt vendeve të Bashkimit Europian dhe SHBA- ve. Këto veprime bëheshin kundrejt pagesës së shumave të ndryshme që varionin nga 8.000 euro deri në 12.000 euro. Ndihma e ofruar konsistonte në falsifikimin e dokumenteve në vendet e origjinës shtete të BE- së, ku këta shtetas në bashkëpunim me njëri- tjetrin mundësonin gjetjen e personave dhe më pas pajisjen e tyre me dokumente të falsifikuara ( karta identiteti italiane dhe greke, viza, leje drejtimi, karta studenti etj.) dhe nga përdorimi i tyre mundësohej kalimi për në Angli dhe SHBA.
LABORATORI I SEKUESTRUAR
Kreu i policisë së Shkodrës, Vehbi Bushati deklaroi në përfundim të oper- acionit janë sekuestruar në cilësinë e provës materiale një laborator për falsifikimin e dokumenteve, në të cilin u gjetën: 3 njësi kompjuteri, 2 laptopë, 5 skanera, 5 printera, 3 printerskaner, 5 vula të ndryshme; 14 USB, 17 tamponë vulash, 1 pasaportë biometrike, 1 kartë identiteti, 10 platforma me strukturë plastike, 2 karta identiteti të huaja, fotografi pasaportash, materiale kancelarie të ndryshme, lëndë narkotike e dyshuar kanabis sativa 2 kg, 9 telefona celularë, 4 automjete të markave të ndryshme dhe 1 armë gjahu. Ky është rasti i tretë brenda këtij viti i goditjes së këtyre grupeve kriminale që merren me trafikimin e shtetasve të ndryshëm. Rreth 40 persona u arrestuan në muajin mars të këtij viti ndërsa 17 të tjerë u arrestuan në muajin maj të po këtij viti, mes të cilëve edhe disa nga Shkodra. Ky është grupi i tretë që goditet brenda pak kohësh nga Policia e Shtetit.