Vetingu, ONM kërkon shkarkimin e gjyqtarit Malaj
U konfirmuan në detyrë, kush janë pesë subjektet për të cilët u rekomandua ankimim KPK rrëzoi raportin e DSIK për lidhjet e magjistratit me elemente kriminale
Operacioni Ndërko mbëtar i Monitorim it i paraqiti Komisionerëve Publikë ditën e djeshme rekomandimin për të ankimuar në Kolegjin e Posaçëm të Apelimit vendimin e KPK- së për konfirmimin në detyrë të të Artur Malaj. Magjistrat në Gjykatën Administrative të Apelit, Tiranë, njëkohësisht kandidat për Inspektor i Lartë i Drejtësisë, u konfirmua në detyrë nga Komisioni i Pavarur i Kualifikimit më 3 gusht. Pavarësisht se Malaj kaloi me sukses të tria shtyllat e rivlerësimit, ndërkombëtarët dolën kundër gjykatësit. "Trupi gjykues pasi dëgjoi zotin Malaj, e konsideron të përfunduar seancën dëgjimore. Në përfundim të këtij procesi të rivlerësimit trupi gjykues, vendosi konfirmimin në detyrë të zotit Artur Malaj", deklaroi më herët relatorja Genta Tafa Bungo. Ndërkohë në seancën dëgjimore, Komisioni i Pavarur i Kualifikimit doli kundër DSIK për Malaj. DSIK e konsideronte të papërshtatshëm Malaj për të vijuar ushtrimin e detyrës pasi ishin zbuluar lidhje të tij me elemente kriminale. Në raportin e këtij institucioni thuhej, gjithashtu, se ka dyshime se Malaj është përfshirë në afera korruptive gjatë kohës që ushtronte detyrën e kryetarit të gjykatës në Vlorë. Ai dyshohet se ka favorizuar palët në proces kundrejt ryshfetit. Komisioni tha se pasi administroi dosjet gjyqësore dhe i shqyrtoi ato arriti në përfundimin se raporti i DSIK ishte i paplotë dhe i pabazuar. Gjatë hetimit administrativ ai ka rezultuar me probleme edhe sa i përket shtyllës së pasurisë, pasi kishte dyshime që ka bërë kontratë noteriale fiktive me një ndërtues për blerjen e një apartamenti më Tiranë, ndërsa personat e
bashkëlidhur me të nuk kishin të ardhura të mjaftueshme për të justifikuar një vile në Vlorë ku gjykatësi zotëron një pjesë të kësaj prone. Konkretisht gjyqtari kishte dy troje të përfituar me ligjin 7501 në Llakatund të Vlorës, një apartament në kryeqytet, garazh dhe një automjet. Ndonëse konstatoi disa parregullsi në shuma të papërfillshme, KPK vlerësoi si të deklaruar saktë ndër vite dhe të justifikuara edhe tri llogari të bashkëshortes së tij, gati 200 mijë euro në total, të përfituara nga puna e saj si notere. Gjatë kësaj seance dëgjimore për rreth 20 minuta, gjyqtari bëri pyetje e përgjigje me vëzhguesin ndërkombëtar.
Kujtojmë se pas konfirmimit në detyrë nga Komisioni i Pavarur i Kualifikimit, gjyqtari i Gjykatës Administrative të Apelit të Tiranës, Artur Malaj ka folur me gazetarët pas vendimin. Malaj është shprehur se falënderon KPK- në për rikonfirmimin dhe se tani mund të vazhdojë i qetë garën për kreun e ILD- së. "S'kam asnjë koment. Falënderoj KPK- në për punën e bërë. Do të vazhdoj detyrën ashtu si edhe më parë. Unë jam një nga kandidatët e ILD- së, për këtë arsye iu nënshtrova vetingut të përshpjetuar, gara për kreun e Inspektoratit të Lartë i Drejtësisë do të vazhdojë, nuk e di se si do të mbarojë. Por di të them që ambicia ime është ILD- ja", u shpreh më herët Malaj. Por një javë pas vendimit, ONM kërkon të rishikohet vendimi i KPK. Komisionerët Publikë, pasi t'u jetë njoftuar vendimi me shkrim i Komisionit të Pavarur të Kualifikimit, do ta shqyrtojnë atë krahas rekomandimit të Operacionit Ndërkombëtar të Monitorimit.
ANKIMIMET
Ky është rekomandimi i pestë nga ONM për të ankimuar vendimin për 5 subjekte të rivlerësimit që kanë kaluar vetingun. Konkretisht subjektet për të cilët ONM ka rekomanduar ankimimin e vendimit të KPK- së janë: Gjyqtari i Gjykatës Kushtetuese Bashkim Dedja; Kreu i Gjykatës së Lartë Xhezair Zaganjori; Gjyqtari i Administratives Gentjan Medja; Prokuror në Prokurorinë pranë Gjykatës së Shkallës së Parë për Krimet e Rënda Gentian Osmani; Gjyqtari i Gjykatës Administrative të Apelit Tiranë, Artur Malaj. Bazuar në pikën 7, të nenit 55, të ligjit nr. 84/ 2016, "Për rivlerësimin kalimtar të gjyqtarëve dhe prokurorëve në Republikën e Shqipërisë", Komisioni i Pavarur i Kualifikimit ka 30 ditë afat për t'ia njoftuar vendimin me shkrim Komisionerëve Publikë. Ky vendim ende nuk është njoftuar. Bazuar në pikën 1, të nenit 63, të ligjit nr. 84/ 2016, "Për rivlerësimin kalimtar të gjyqtarëve dhe prokurorëve në Republikën e Shqipërisë", Komisionerët Publikë, brenda 15 ditëve nga data e njoftimit të vendimit nga Komisioni i Pavarur i Kualifikimit, kanë të drejtë të paraqesin ankim pranë Kolegjit të Posaçëm të Apelimit.
Institucioni i Komisionerëve Publikë është ngritur dhe funksionon në bazë të nenit 179/ b dhe aneksit të Kushtetutës së Republikës së Shqipërisë dhe ligjit nr. 84/ 2016, "Për rivlerësimin kalimtar të gjyqtarëve dhe prokurorëve në Republikën e Shqipërisë". Komisionerët Publikë përfaqësojnë interesin publik gjatë procesit të rivlerësimit kalimtar të gjyqtarëve dhe prokurorëve në Republikën e Shqipërisë.