Projekti rrugor Qafë Thanë- Pogradec, Shehi: I gabuar, me plot rreziqe

"Vepër e shtrenjtë dhe e panevojshme"

Kreu i LZHK- së, deputeti Dashamir Shehu, evidenton disa probleme qe ai sheh nga projekti që po vihet në zbatim aktualisht në segmentin e rrugës Qafë- Thanë- Pogradec, konkretisht në pjesën e fundit në hyrje të qytetit të Pogradecit. Sipas Shehit, ky projekt është i gabuar dhe një rrezik permanent për rrëshqitje të reja. "Dy fjalë për një vepër të shtrenjtë dhe të panevojshme. Në të hyrë të Pogradecit po ndërtohet segmenti i fundit i rrugës së re Qafë Thanë- Pogradec, rreth 900 metra i gjatë . Pjesa tjetër e rrugës pothuajse ka mbaruar dhe për të qenë të sinqertë është një rrugë e një kualiteti të lartë për standardet tona të ndërtimit përtej zg- jatjes shumëvjeçare për t'u përfunduar ( trotuare, ndriçim, sisteme mbrojtëse metalike, nënkalime). Deri këtu jemi ne rregull. Problemi fillon me pjesën e fundit në të hyrë të Pogradecit", shprehet z. Shehi. Ai vë në dukje se "Eshtë bërë një projekt gjigand me katër tunele të hapura betoni, të ashtuquajtura "panoramike" që kanë kushtuar miliona euro ( rreth 12 milionë thuhet, se në tabelën treguese nuk ekziston shifra) por njëkohësisht është dashur që të krijohet dhe një skarpate ne faqen e malit që për shumë vite do të duket si një gurore gjigande, përtej faktit që vazhdimisht do të jetë e kërcënuar nga rrëshqitja e malit, siç ka ndodhur tashmë". "Si konkluzion, unë mendoj që është një projekt i gabuar dhe i shtrenjtë ( me aq para mund të bëhej i gjithë projekti i ri i sistemimit të zonës nga Pogradeci në Volorekë) aspak ekogjik dhe pa qëndrueshmëri për të ardhmen. Fatkeqësisht ky nuk është i vetmi projekt pjellë e mendjeve të sëmura dhe situatave korruptive që ka prodhuar "rilindja",- tha z. Shehi.