Alibeaj: Qeveria, policia dhe prokuroria të mos heshtin për trafikantin Mond Bego
“Misioni ynë, të shkëpusim krimin nga politika”
Partia
Demokratike iu referua sërish ditën e djeshme biznesmenit të arrestuar në Greqi, Edmond Bego. Deputeti Enkelejd Alibeaj, në një dalje për mediat kërkoi shpjegime për këtë person edhe nga kreu i grupit parlamentar socialist, Taulant Balla. Deputeti i PD Alibeaj tha se heshtja nuk e shpëton dot Taulant Ballën duke i kërkuar të tregojë sa herë ka komunikuar me Edmond Begën. Po kështu Alibeaj e ka pyetur Ballën nëse është sekser për miliona euro punë publike të marra nga kompania e ndërtimit të narkotrafikantit biznesmen. Ai tha se policia drejtohet nga krimi dhe prokuroria nuk ka sekuestruar pasuritë e Begos në zbatim të ligjit antimafia. "Qeveria në pakt me krimin, parlamenti i varur nga krimi, policia e drejtuar nga krimi dhe prokuroria nën urdhrat e krimit po heshtin për t'i dhënë kohë numrit dy të Partisë Socialiste, që të mbulojë me harresë
akuzat publike për lidhjet e tij me trafikantin e rrezikshëm ndërkombëtar të drogës, Mond Bego. Në vend që policia t'u thotë sh-
qiptarëve pse autoritetet greke kanë arrestuar dhe kanë vendosur të mbajnë në burg narkotrafikantin me lidhje politike, policia hesht. Në vend që prokuroria të nisë menjëherë hetimet për të zbardhur arsyet e mosveprimit të Policisë së Shtetit ndaj trafikantit të shndërruar në biznesmen të fuqishëm ndërtimi, prokuroria hesht. Ne vend që Edi Rama t'i kërkojë Taulant Ballës të sqarojë pozicionin e tij, Edi Rama hesht",- tha Alibeaj. Deputeti demokrat deklaroi se Partia Demokratike nuk do të heqë dorë nga misioni i saj për të shkëputur krimin nga politika. "Në vend që Taulant Balla t'u përgjigjet pyetjeve, kryetari i grupit parlamentar të Partisë Socialiste, hesht, me shpresën se gjithçka do të harrohet. Taulant Balla dhe padroni i tij, Edi Rama, e kanë gabim. Duke përfaqësuar pjesën më të mirë dhe më të madhe të shoqërisë që nuk pranon të qeveriset nga krimi, Partia Demokratike nuk do të heqë dorë nga misioni i saj për të shkëputur krimin nga politika",- u shpreh ai.