Opozita bojkoton Kuvendin, sot zhvendoset në Elbasan

Ligji i debatuar "Për statusin e gjyqtarëve dhe prokurorëve", në parlament Në rend dite, akti normativ i buxhetit të shtetit

Kuvendi i Shqipërisë do të mblidhet sot në seancë plenare, në të cilën është futur për votim edhe ligji i shumëdebatuar për statusin e gjyqtarëve dhe prokurorëve, që kërkon votim me shumë prej 3/ 5. Në rendin e ditës së Kuvendit janë edhe ndryshimet në Kodin Rrugor, që po ashtu kërkojnë votim me shumicë prej 3/ 5. Gjithashtu, në rend dite është edhe akti normativ i buxhetit të shtetit, por opozita do ta bojkotojë sërish seancën e sotme plenare. Pas Shkodrës, opozita do të mblidhet në qytetin e Elbasanit. Burimet bëjnë të ditur se takimi do të zhvillohet në orën 10: 00. Në momentin kur do mblidhet Kuvendi, deputetët e opozitës do shkojnë në Elbasan për të mbajtur atje paralelisht një tryezë diskutimi, sërish për çështjet e kriminalitetit. Të hënën opozita u mblodh në Shkodër nga ku ngritën shqetësime për ngjarjet e fundit kriminale atje, ndërsa paralelisht zhvillonte punimet seanca e Kuvendit në Tiranë, duke nisur sesionin e ri parlamentar. Opozita akuzon maxhorancën se ngjarjet e fundit kriminale janë rrjedhojë e kapjes së qeverisë dhe Policisë së Shtetit nga krimi. Opozitarët kanë vendosur të bojkotojnë për të dytën herë radhazi seancën plenare, për t'u zhvendosur në një tjetër qytetet, pas Shkodrës në Elbasan, duke e vlerësuar këtë të fundit si qytetin e dytë në vend ku sipas tyre fshihen lidhjet e forta krim- qeveri. Nga veriu i vendit, pak ditë më parë Lulzim Basha paralajmëroi se çlirimi i qeverisë nga krimi do të jetë prioritet i opozitës në këtë sesion të ri, ndërsa foli për një platformë politike, që parashikohet të përgatitet nga opozita për t'i dhënë vendit siguri dhe rend. Kryedemokrati nuk foli për bojkot, por aleati i saj LSI konfirmoi për mediat mar- rëdhënie të kushtëzuar me parlamentin. Të enjten socialistët prisnin kolegët e tyre opozitarë për të miratuar bashkë ndryshimet në ligjin për statutin e gjyqtarëve dhe prokurorëve, që i hapin rrugë zhbllokimit të shkollës së magjistraturës, e cila do të vijojë të mbesë e bllokuar për sa kohë opozita ka vendosur që të mos ketë normalitet në Kuvend, pa çliruar më parë sipas saj, qeverisjen e vendit nga krimi.

TAKIMI

Pas Shkodrës, opozita do të mblidhet në qytetin e Elbasanit. Burimet bëjnë të ditur se takimi do të zhvillohet në orën 10: 00. Në momentin kur do mblidhet Kuvendi, deputetët e opozitës do shkojnë në Elbasan për të mbajtur atje paralelisht një tryezë diskutimi, sërish për çështjet e kriminalitetit.