Kreu i Hipotekës: Trajtimi i praktikave të prapambetura, brenda shtatorit
Rregullat e reja për dosjet për regjistrimin e pasurive të paluajtshme Regjistrimet, Pjetri: Duhet të plotësohen vetëm me një akt verifikimi
Të gjitha praktikat e prapambetura për regjistrimin e pronave do të mbyllen brenda muajit shtator. Ndërsa regjistrimi i pasurive të paluajtshme do të kryhet pasi të plotësohet vetëm një akt verifikimi të dosjes. Këto janë dy porositë që kreu i Hipotekave, Valdrin Pjetri u ka dhënë vartësve të tij në një mbledhjen e fundit.
REGJISTRIMI
Qytetarët duhet të plotësojnë dosjet për regjistrimin e pasurive të paluajtshme vetëm me një akt verifikimi. Deklarata vjen nga kryeregjistruesi Valdrin Pjetri, në mbledhjen me drejtuesin e ZVRPP- ve, ku kërkoi zbatimin rigoroz të urdhrit të lëshuar prej tij, që përcakton nxjerrjen e një akti verifikimi për një dosje. "Akt verifikimi për një dosje të ketë vetëm një. Ka raste kur punonjësit bëjnë pingpong me qytetarët duke u kërkuar plotësimin e dosjes me disa akt verifikime. Të studiohet mirë dosja dhe të dalë vetëm një akt verifikimi. Ju kërkoj zbatimin e urdhrit të nxjerrë nga kryeregjistruesi me nr. 937, datë 12.06.2018 për këtë çështje", tha Pjetri. Duke vënë në qendër të vëmendjes së Zyrës Qendrore të Regjistrimit të Pasurive të Paluajtshme shërbimin ndaj qytetarëve, Pjetri u ka kërkuar drejtuesve vendorë që të verifikojnë çdo ankesë të platformës së bashkëqeverisjes, si dhe ka paralajmëruar largimin e punonjësve që kanë abuzuar me afatet e dhënies së këtij shërbimi. Po ashtu, një tjetër kërkesë e tij në drejtim të regjistruesve ka qenë edhe ajo për trajtimin e praktikave të prapambetura brenda datës 31 shtator 2018.
REGJISTRIMET
Regjistrimi i kontratave të shitjes, të dhurimit të heqjes dorë nga prona, regjistrimi i kontratës së shkëmbimit apo akti i trashëgimisë shoqërohen me një sërë dokumentacioni, i cili duhet të jetë i plotësuar në momentin që pronari i një pasurie do të kryejë një veprim me të tek noteri. Janë 51 veprime që kryhen me pronësi nga Zyrat e Regjistrimit të Pasurive të Paluajtshme. Regjistrimi i akteve noteriale që lidhen ndërmjet zhvilluesit të pronës dhe pronarëve të pa- surisë apo me subjektet e treta kushton 3500 lekë. Ndërsa regjistrimi i të gjitha kontratave për shitje, dhurim, heqje dorë nga pronësia, shkëmbim, dhënie me qira apo akt trashëgimie do të kushtojnë nga 700 lekë deri në 3500 lekë. Konsultimi i kartelës së pasurisë dhe të dhënave të tjera të pasurisë së paluajtshme do të ketë një tarifë prej 700 lekësh. Ndërsa verifikimi ' online' i gjendjes juridike të pronësisë në regjistrin elektronik të pasurive të paluajtshme do të ketë tarifën 600 lekë. Sipas kryetares së Dhomës së Noterisë, regjistrim i kontratës së shitjes, kontratës shkëmbimit dhe kontratës së dhurimit me rezerve/ kusht të pasurisë së paluajtshme do të kushtojë 900 lekë. Regjistrimi i kontratës së hipotekës për garantimin e kredisë së dhënë nga banka apo institucion tjetër kredidhënës për kredi me vlerë deri në 1.000.000 lekë do të ketë një tarifë prej 7500 lekë.
DOKUMENTET
Sipas listës së Hipotekës, për regjistrimin e kontratave të shitjes së pronës duhet: dokument identifikimi, kontrate shitjeje, deklaratë noteriale, vërtetim nga organi i njësisë vendore mbi përbërjen e familjes, certifikatë e gjendjes familjare dhe deklaratë e anëtarëve të familjes bujqësore për zgjedhjen e një përfaqësuesi të ri të familjes bujqësore. Ndërsa për lëshim kopjeje të fragmentit të hartës kadastrale duhet: harta treguese e pasurisë, planrilevimi, kartela e pasurisë dhe dokument identifikimi. Ndërkohë që për regjistrimin apo fshirje e hipotekës ligjore duhet që personi i interesuar të ketë: vendim gjykate për fshirje, deklaratë noteriale, dokument identifikimi, vendim gjyqësor ose akt noterial për vendosjen e hipotekimit, kartela e pasurisë ( kopje) dhe harta treguese e pasurisë.
Akt verifikimi për një dosje të ketë vetëm një. Ka raste kur punonjësit bëjnë pingpong me qytetarët duke u kërkuar plotësimin e dosjes me disa akt verifikime. Të studiohet mirë dosja dhe të dalë vetëm një akt verifikimi.