Nikos Kotzias: Shumë shpejt mbyllen negociatat për 10 çështje me Shqipërinë
Kryediplomati grek: Problemet e së shkuarës janë tejkaluar në mënyrë efektive "Nuk kishte shanse të negocioje në regjimin e Enver Hoxhës"
Ministri i Jashtëm grek, Nikos Kot zias ka deklaruar se shumë shpejt do të përfundojnë negociatat me Shqipërinë. Deklaratat ai i bëri gjatë fjalës së institutin norvegjez të marrëdhënieve ndërkombëtare në Oslo. "Përmes një politike të jashtme proaktive, ne jemi pranë zgjidhjes së problemeve të vjetra me Shqipërinë. Shumë shpejt besoj, ne do t'i përfundojmë negociatat për një paketë me dhjetë çështje. Kjo paketë përfshin përcaktimin e kufijve dhe zonave detare, etj.", u shpreh Kotzis. Sipas kryediplomatit grek, problemet e së kaluarës janë tejkaluar në mënyrë efektive. "Shqipëria ishte nën regjimin izolacionist të Enver Hoxhës, kështu që nuk kishte shanse për të negociuar me të. Në një masë të konsiderueshme deri në kohën e qeverisë sonë, Ballkani, Evropa Juglindore ishte një burg i paragjykimeve dhe stereotipave dhe jo një vend bashkëpunimi paqësor. Bazuar në këtë parim, ne vendosëm bashkëpunimin tonë dhe të gjitha platformat e ndryshme që tani ekzistojnë me Tiranën dhe Shkupin. Unë besoj se në këtë mënyrë arritëm të vepronim në mënyrë efektive me problemet e së kaluarës", theksoi ministri i Jashtëm grek. Një ditë më parë, kryeministri grek Aleksis Cipras deklaroi se Ministritë e Jashtme po punojnë bashkërisht për negociatat, por sipas tij çështja çame nuk është në tryezën e bisedimeve. "Negociatat po zhvillohen nga dy ministrat e Jashtëm, janë çështje të vështira, por negociatat ndodhen në një nivel të mirë. Është e qartë se që të mbështesë Greqia
hapjen e kapitujve për anëtarësimin e vendit fqinj, duhet që Shqipëria të përmbushë një sërë angazhimesh. Shumë nga këto angazhime ekzistojnë prej kohësh, që nga viti 2009. E kam fjalën për zonat detare, ndryshimin e teksteve shkollore, varrezat e ushtarëve grekë në Shqipëri. Dhe sigurisht, një çështje shumë e rëndë-
sishme e reformave janë ato në lidhje me të drejtat e minoritetit grek", deklaroi një ditë më parë Cipras. Në fjalimin e tij me titull "Parimet e politikës së jashtme greke: theksi mbi stabilitetin në Europën Juglindore", ministri i Jashtëm grek, Nikos Kotzias deklaroi se këto parime janë përqendruar te paqja dhe dialogu. Sipas tij, interesi i Greqisë është i lidhur me rajonin e Ballkanit për shkak të ekonomisë së saj, kapitalit njerëzor dhe infrastrukturës, që janë të një rëndësie të jashtëzakonshme për zhvillimin ekonomik të të gjithë rajonit. Kotzias bëri një pasqyrë të hollësishme për 12 parimet e politikës së jashtme greke, që janë shoqëruar me 16 iniciative dhe nëntë konfigurime ndërkombëtare, të cilat janë krijuar gjatë mandatit të tij si ministër i Jashtëm. Në lidhje me Maqedoninë, Kotzias tha: "Marrëveshja e Prespës nuk është as rezultat i rrethanave dhe as zgjidhje e një presioni të jashtëm, ashtu siç është pretenduar nga opozita greke".