Koçi: I bindur se do sakrifikoni veten për të shpëtuar qytetarët
Nisen për në Bunavi, 144 rekrutë të rinj
144
rekrutë të rinj u nisën për në Shkollën e Trupës në Bunavi, Vlorë. Në ceremoninë zyrtare të nisjes së tyre në Qendrën e Personel- Rekrutimit, zëvendësministri i Mbrojtjes, Petro Koçi u tha të rinjve se ata nuk do të jenë pjesë e zakonshme e administratës shtetërore, por do hyjnë në një nga strukturat, e cila në çdo sondazh ka dalë më e pëlqyera dhe më e dashura për publikun dhe për popullin. "Në sa e sa raste ata që më përpara jush janë bërë pjesë e FA, kanë përballuar emergjenca civile në zjarre apo në përmbytje. Edhe ju, si ata, do të bëni të njëjtën gjë. Jam i bindur që ju do të sakrifikoni nga vetja juaj për të shpëtuar qytetarët tanë, apo për të shpëtuar pronën, atë publike apo edhe atë private. Jam i bindur se shumë prej jush, ata më të mirët, do të jenë pjesë e misioneve ndërkombëtare në Afganistan, në Kosovë, në Bosnje, në Detin Egje apo edhe në misione të tjera, ku do të sjellë zhvillimi i skenës ndërkombëtare e ku do të duhet që Forcat e Armatosura të NATO të jenë prezentë për të ruajtur paqen e sigurinë, sepse ju e dini se sot rreziqet janë asimetrike", - u shpreh në fjalën përshëndetëse zëvendësministri i Mbrojtjes. Pranë Qendrës së PersonelRekrutimit u paraqitën 304 kandidatë, por pas testeve fizike, intelektuale dhe psikologjike, në fund u shpallën fitues vetëm 144, nga të cilët 7 kandidatë janë femra dhe 10 me arsim të lartë. Gjithashtu, në këtë ceremoni 3 ushtarakë morën gradën "oficer" dhe 3 të tjerë "nënoficer".