Negociatat, ministri gjerman në Tiranë: Integrimi s'është fjalë, vijoni reformat
Kryeministri kërkon mbështetjen e Merkel për kryesimin e OSBE Heiko Maas: Qershori 2019, jo automatizim i çeljes së bisedimeve
Ministri i Jashtëm shqiptar deklaroi dje, se për opozitën janë bërë oferta në lidhje me ato çështje që konsiderohen çështje të përbashkëta, ka një ofertë tjetër për të mbështetur procesin e vetingut e po kështu një tjetër ofertë për përmbylljen e reformës zgjedhore. Bushati tha se ka edhe një ofertë tjetër për opozitën sa i përket votimit për shkollën e magjistraturës. "Dialogu dhe thirrjet për bashkëpunim nuk do të mungojnë",- tha Bushati.
Kryeministri Edi Rama kërkoi dje, mbështetjen e Gjermanisë në mënyrë që Shqipëria të marrë kryesimin e OSBE- së. Këtë kërkesë Rama ia bëri ministrit të Jashtëm gjerman Heiko Maas, i cili erdhi për një vizitë në Tiranë. Nga ana e tij, ministri gjerman bëri të qartë se caktimi i qershorit 2019 nuk është një vendim që nënkupton hapjen automatike të negociatave, ndaj duhet vijuar me reformat dhe jo me fjalë. "Ne jemi shumë mirënjohës qeverisë federale, Kancelares për rolin e rëndësishëm, në funksion të mbështetjes së një prej reformave më themelore shtetbërëse të Shqipërisë europiane, reformës në drejtësi, si dhe padyshim të gjitha reformave të tjera që lidhen drejtpërdrejt me progresin në funksion të integrimit në Bashkimin Europian",- u shpreh Rama. "Unë do të përsëris një kërkesë që ne e kemi bërë, për të marrë mbështetjen e qeverisë federale për kandidaturën e Shqipërisë për të drejtuar OSBE- në. Jemi të bindur që kjo do të kontribuonte edhe në funksion të vetë dinamikave të rajonit tonë, të procesit integrues të rajonit dhe do të ishte një incentivë për Shqipërinë dhe për rajonin",u shpreh Rama. Nga ana e tij, ministri Maas, duke iu drejtuar kryeministrit Rama i tha: "Mënyra kurajoze për të bërë politikë është demonstruar tashmë e suksesshme. Fakti që janë nisur reforma të thella, sikurse është ajo e drejtësisë, e kudo njohur dhe gjithsekush këtu, në rajon, apo në Berlin, apo në BE, e dinë se sa e rëndësishme është kjo reformë për perspektivën europiane të Shqipërisë, ndaj është mjaft e rëndësishme që qeveria të mund të vijojë më tej, në rrugën e nisur tanimë. Ju jeni një vend që mund të konsideroheni si spirancë e stabilitetit dhe qëndrueshmërisë në rajon.
Në qershor, Bashkimi Europian vendosi që prej vitit 2019 mund të nisin bisedat për anëtarësimin me Bashkimin Europian, por për këtë duhet që të vijonin më tej edhe proceset e reformave. Sigurisht që ka kundërshti, apo të themi rezistencë në këto procese, të cilat do të duhet të kapërceheshin në mënyrë të tillë që të sigurohet perspektiva europiane dhe të gjithë do duhej të dinin të përballeshin me këto çështje",- u shpreh ministri gjerman. "Gjithsesi, Shqipëria mund të mbështetet gjithmonë në ndihmën e Gjermanisë. Perspektiva europiane e Shqipërisë nuk është vetëm fjalë nga ana jonë dhe nëse ju do të vijonit me rrugën tuaj, sikurse kemi parë vitet e fundit, do të përmbushnit kushtet e kërkuara tanimë, atëherë rruga drejt BE do të vijojë, gjithashtu, më tej e për këtë keni mbështetjen tonë të plotë",- u shpreh Maas. Ministri i Jashtëm gjerman pati një takim më herët me homologun e tij shqiptar, Dit- mir Bushati e më vonë edhe me kreun e opozitës Lulzim Basha. Gjatë konferencës së përbashkët me ministrin Bushati, Maas tha se vendimi i marrë që cakton si datë qershorin 2019
"është një vendim, i cili tregon, gjithashtu, vlerësim për reformat që janë ndërmarrë në vitet e fundit në Shqipëri dhe mendoj që ka qenë vërtet një angazhim mjaft energjik, politik, tepër kurajoz përmes të cilit shumë çka është realizuar, jo domosdoshmërisht ka qenë e thjeshtë dhe për këtë, Shqipëria mund të jetë mjaft krenare". "Në të njëjtën kohë, shtoi Maas, sikurse e dimë, shtetet anëtare të Bashkimit Evropian kanë bërë, gjithashtu, të qartë që qershori i vitit 2019 nuk do të jetë një automatizim për sa i përket nisjes apo çeljes së bisedimeve të anëtarësimit. Kriteret për këtë janë të hapura dhe të qarta, të ditura dhe të qarta, pra, duhet të ekzistojnë hapa për rezultate të tjera për sa i përket reformave në mënyrë të tillë që të mund të bindim edhe të gjithë ata që janë disi skeptikë për sa i përket këtij procesi. Bëhet fjalë më së shumti për konsolidimin e shtetit ligjor apo pavarësinë e sistemit të drejtësisë".