Meta pret Millard: Me rëndësi ecuria e reformave për të forcuar shtetin
Zv/ ndihmës sekretarja e SHBA, tri ditë në Tiranë
Presidenti
i Republikës Ilir Meta priti dje, në takim zëvendës/ ndihmësen e Sekretarit Amerikan të Shtetit, znj. Elisabeth Millard. Të dy bashkëbiseduesit vlerësuan rëndësinë e ecurisë së reformave për të forcuar shtetin e së drejtës në interes të konsolidimit të ligjit, si dhe të integrimit europian. Presidenti Meta garantoi znj. Millard se Shqipëria është e vendosur në përmbushjen e detyrimeve që burojnë nga dokumenti i Partneritetit Strategjik Shqipëri- SHBA. Gjatë takimit u diskutua edhe për zhvillimet në rajonin e Ballkanit Perëndimor. Presidenti Meta theksoi rëndësinë e finalizimit të dialogut Kosovë- Serbi përmes marrëveshjes që garanton perspektivën europiane, konsolidon bashkëjetesën ndëretnike dhe paqen në rajon. Meta e zyrtarja e lartë e DASH theksuan rëndësinë e suksesit të referendumit në Maqedoni për të ardhmen europiane të të gjithë rajonit. Ndihmës sekretarja amerikane u takua dje edhe me kreun e PD- së, Lulzim Basha, i cili sipas njoftimit për shtyp të PD- së e njohu zyrtaren me përkeqësimin e të gjitha standardeve të demokracisë dhe kapjen e shtetit nga krimi i organizuar në Shqipëri. Lideri i opozitës vuri në dukje se, ndonëse ligji i dekriminalizimit, që u realizua falë këmbënguljes dhe vendosmërisë së PD, nxori jashtë institucioneve 333 persona me rekorde kriminale, sot lidhja krim- politikë ka gjetur forma të tjera për të qenë në krye të institucioneve vendimmarrëse nga Kuvendi dhe qeveria, në bashki, polici e kudo. Kreu i opozitës shprehu vendosmërinë për t'i shkuar deri në fund pastrimit të politikës nga krimi duke kërkuar ndihmën dhe mbështetjen edhe të SHBA në këtë proces jetik për vendin dhe të ardhmen e vendit.