10 prokurorë: Marku shkeli ligjin, nuk na transferon dot pa dëshirë
"Refuzimi për dosjen Shullazi? Prokurorët caktohen në fillim, jo në fund" Letër ankesë drejtuar ambasadave dhe PAMECA- s
Zbulohet letra e 10 prokurorëve për të cilët Prokurorja e Përgjithshme e përkohshme Arta Marku kërkoi hetim disiplinor. Letra i është dërguar mediave, zyrës së delegacionit të Bashkimit Europian në Republikën e Shqipërisë, Misionit PAMECA si dhe ambasadës amerikane. Ata tregojnë për mbledhjen e mbajtur më 29 shtator ku, siç pretendojnë, nuk janë njoftuar për objektin e saj.
Prokurorët deklarojnë se hedhja e shortit, dhe ideja vijuese për krijimin e një grupi hetimor prej 4 ( katër) prokurorësh në gjykimin e një çështjeje penale, vinte në momentin kur çështja në fjalë ndodhej në fazën e diskutimeve përfundimtare, dhe grupet hetimore krijohen në fazën e hetimit dhe jo në fazën e gjykimit, aq më pak në fazën e diskutimeve përfundimtare. Një kërkesë e tillë, sipas tyre cenonte parimet e nenit 6 të ligjit nr. 97 "Për organizimin dhe funksionimin e prokurorisë në Republikën e Shqipërisë" në lidhje me pavarësinë dhe integritetin e prokurorëve, aq më tepër në një fazë të tillë të procesit, kur hetimi, akuzat, debati gjyqësor, qëndrimet mbi vlefshmërinë e provave dhe vlera e tyre provuese ishin kryer nga prokurorë të tjerë të çështjes. Argumentimi ligjor, parimor dhe mbi baza etike nga shumica e prokurorëve, nuk u mor parasysh nga drejtuesja e komanduar e PKR, e cila kërkoi ndërprerjen e menjëhershme të debatit, duke nisur procedurën e hedhjes së shortit.
"Duke u ndjerë në kushtet e paligjshmërisë së procesit, pjesa më e madhe prokurorëve, e përbërë nga 9 prej tyre, pasi paraqitën argumentet e tyre, dhe në mungesë vullneti nga drejtuesja e PKR për të diskutuar profesionalisht ligjshmërinë e procesit dhe argumentet, u larguan nga shorti. Në të njëjtën ditë, më datë 19 shtator 2018, grupi i 10 ( dhjetë) prokurorëve u njoh me Njoftimin e Prokurores së Përgjithshme të përkohshme, për nisjen e një procesi disiplinor kundër tyre vetëm nëpërmjet mediave",- deklarojnë prokurorët.
Nga pjesa më e madhe e prokurorëve të pranishëm në mbledhje, u paraqitën pretendime në lidhje me kërkesën për hedhjen e shor- tit dhe ligjshmërinë e tij, pasi prokurorët e çështjes Elisabeta Ymeraj dhe Ened Nakuçi, vazhdonin të ishin prokurorë të çështjes, përfshirë këtu edhe prokurorin Besim Hajdarmataj, i cili në fakt, jo më herët se data 18 shtator 2018, përmes një akti me shkrim, i kishte shpre- hur drejtueses së komanduar të PKR vullnetin e tij, për të vazhduar përfaqësimin e çështjes në fjalë, pranë gjykatës kompetente.
"Hedhja e shortit, dhe ideja vijuese për krijimin e një grupi hetimor prej 4 ( katër) prokurorësh në gjykimin e një çështjeje penale, vinte në momentin kur çështja në fjalë ndodhej në fazën e diskutimeve përfundimtare, dhe grupet hetimore krijohen në fazën e hetimit dhe jo në fazën e gjykimit, aq më pak në fazën e diskutimeve përfundimtare.
Një kërkesë e tillë, cenonte parimet e nenit 6 të ligjit nr. 97 "Për organizimin dhe funksionimin e prokurorisë në Republikën e Shqipërisë" në lidhje me pavarësinë dhe integritetin e prokurorëve, aq më tepër në një fazë të tillë të procesit, kur hetimi, akuzat, debati gjyqësor, qëndrimet mbi vlefshmërinë e provave dhe vlera e tyre provuese ishin kryer nga prokurorë të tjerë të çështjes",- thuhet në letrën e prokurorëve.
Ata shpjegojnë se për të garantuar pavarësinë e magjistratëve dhe mbrojtjen nga presionet mbi punën e tyre, ligji në fjalë nuk lejon asnjë transferim apo komandim të magjistratëve pa pëlqimin e tyre. "Cenimi i parimit të pavarësisë së prokurorëve, dëmton rëndë punën e këtij organi dhe ul besimin e publikut tek institucionet e drejtësisë",- deklarojnë ata.