Dita Botërore e Varfërisë, Ruçi: Të pakësojmë numrin e të varfërve
Avokatja e Popullit: Të përcaktohet minimumi jetik. Nikolla: Të rritet buxheti arsimor Senida Mesi: Punësimi i kësaj kategorie, fokusi kryesor
Në Ditën Botërore kundër Varfërisë, kreu i Kuvendit, Gramoz Ruçi u shpreh se qeveria ka ndërmarrë disa reforma në 5 vitet e fundit në lidhje me problemet e mirëqenies dhe uljen e numrit të familjeve të varfra. Aktualisht, në Shqipëri mijëra familje trajtohen me ndihmë ekonomike, ndërsa në 6 mujorin e parë të këtij viti u përfshinë në skenë 52 700 familje. Ruçi tha se është ulur informaliteti dhe se duhet të bëhet më shumë që varfëria të ulet përmes zhvillimit dhe shfrytëzimit të pasurisë kombëtare. "Të reflektojmë dhe të rrisim mbështetjen e Kuvendit për përmirësimin e legjislacionit për këto fusha. Qeveria ka ndërmarrë disa reforma në 5 vitet e fundit në lidhje me problemet e mirëqenies. 200 mijë kontribuues janë shtuar në skemën e pensionit duke luftuar informalitetin. Është e nevojshme që të punojmë që varfëria të ulet përmes zhvillimit dhe shfrytëzimit të pasurisë kombëtare. Kreu i Kuvendit shtoi se problemi i vendit tonë nuk janë të pasurit, siç interpretohet, por problemi janë të varfrit. "Ne nuk synojmë të pakësojmë numrin e të pasurve, por të pakësojmë numrin e të varfërve. Duhet më shumë mbështetje për fermerët, të cilët duhet të paguajnë edhe kontributet. 400 mijë fermerë janë futur në skemën e pensionit. Të shfrytëzohet më mirë mundësitë në fshat"tha Ruçi.
PUNËSIMI
Ndërkohë gjatë tryezës së punës të organizuar nga Kryetari i Kuvendit Ruçi, me fokus uljen e varfërisë, zv. kryeministrja Senida Mesi theksoi se punësimi është shumë më i rëndësishëm sesa ndihma ekonomike që mund ti jepet të varfërve. "Punësim në vend të ndihmës ekonomike. Është objektivi i qartë i qeverisë për të ndihmuar të gjitha familjet në nevojë. T'i japësh njerëzve në çdo pjesë të botës mbështetjen e duhur që ata të dalin nga varfëria është thelbi i zhvillimit të qëndrueshëm ndaj dhe përcaktohet në objektivin kryesor "No poverty". Ky ob-
jektiv përqendrohet tek strategjitë e ndërlidhura, përfshirë promovimin e sistemeve të mbrojtjes sociale, punësimin e duhur dhe ndërtimin e tyre për të ndihmuar në daljen nga varfëria",tha numri dy i qeverisë. Më
tej ajo shtoi se axhenda 2030 dhe dinamikat e integrimit të Shqipërisë në BE kanë mbështetur në mënyrë reciproke rritjen e shpejtë ekonomike dhe përmirësime të rëndësishme në standardet e jetesës. Mesi u ndal tek re-
forma e ndihmës ekonomike, realizuar në bashkëpunim me Bankën Botërore. "Ky projekt mbështeti përpjekjet e qeverisë për të targetuar në mënyrë më efikase burimet për shtresën më të varfër dhe në nevojë, duke përfshirë në Programin e Ndihmës Ekonomike, të varfrit që ishin përjashtuar me parë dhe duke pastruar skemën përmes reduktimit të rasteve të mashtrimeve dhe gabimeve",- tha Mesi. Sakaq, Avokatja e Popullit këmbënguli në përcaktimin e minimumit jetik. "Unë e kuptoj që fondi është ai që është, por edhe ju duhet ta kuptoni që njerëzit nuk jetojnë dot me këtë vlerë të ulët"- u shpreh Erinda Ballanca. Ndërsa Ministrja e Arsimit, Sportit e Rinisë, Lindita Nikolla foli për nevojën e rritjes së buxhetit arsimor. "Ne duhet të rrisim buxhetin për arsimin. Reforma jonë arsimore dhe treguesit e saj për çdo fëmijë nga 3- 18 vjeç dhe në arsimin e lartë po jep çdo ditë rezultatet e veta. Ne sivjet adresuam klasat kolektive. 345 klasa kolektive u mbyllën",- tha Nikolla.