Ngjarja, PDIU: Ekstremisti i Agimit të Artë qëllon policinë brenda Shqipërisë
"Ndalohen patriotët shqiptarë të protestojnë"
Partia Drejtësi, Integrim dhe Unitet denoncoi dje sjelljen e policisë, pasi pretendon se përfaqësues të saj nuk janë lejuar që të protestojnë në ceremonia përkujtimore të të rënëve grekë në luftën italo- greke të viteve ' 40. Përmes një reagimi për mediat, PDIU thekson se dënon ngjarjen në fjalë që ndodhi në Këlcyrë. Po ashtu PDIU reagoi edhe lidhur me incidentin e rëndë që ndodhi dje në Bularat të Gjirokastrës, ku një person hapi zjarr ndaj makinës së policisë dhe tashmë është në kërkim. "Është e papranueshme që një ekstremist i Agimit të Artë që të jetë i pranishëm në territorin shqiptar në ceremoninë e varrezave për ushtarët grek dhe më pas ky ekstremist, qëllon Policinë Shqiptare", thuhet në reagim. Sipas PDIU Kostandinos Kaçifa, është ekstremisti i Agimit të Artë. "Ndalohen patriotët shqiptarë të protestojnë dhe u hapet rrugë provokimit me armë të esktremistëve të Agimit të Artë. Policia nuk u jep leje patriotëve shqiptarë që të protestojnë për fyerjet që u bëhet të gjithë shqiptarëve me varrezat greke në Këlcyrë dhe bërjen e tyre vend pelegrinazhi për ekstremistët grek të Vorio- Epirit. Patriotët shqiptarë si Elida Jorgoni kanë të gjithë të drejtën për të protestuar dhe ndalohen e arrestohen padrejtësisht nga policia". PDIU dënon këtë veprim të Rilindësve të rinj, të cilët po lëvizin nga vendprehjet e tyre Rilindësit e vjetër. "Si është e mundur që disa shqiptarë patriot, të ndalohen të protestojnë në territorin e tyre në Këlcyrë, ndërkohë që në Gjirokastër lejohet që një ekstremist i Agimit të Artë, Konstatinos Kaçifas, të qëllojë Policinë e Shtetit. Është e papranueshme që një ekstremist i Agimit të Artë të jetë i pranishëm në territorin shqiptar në ceremoninë e varrezave për ushtarët grek dhe më pas ky ekstremist, qëllon policinë shqiptare. Partia Drejtësi, Integrim dhe Unitet bën thirrje që ekstremisti i Agimit të Artë të arrestohet nga Policia",- thuhet në reagimin e PDIU.
AKUZA
"Ndal relativizimit, por të arrestohen dhe të ndalohen ekstremistët e Agimit të Artë dhe "trimoshat e VorioEpirit", të cilët kanë marrë zemër nga Rilindësit e rinj, që për turp po ngrenë varrezat e atyre që erdhën si pushtues duke fyer shqiptarët. Kanë harruar mijëra të vrarë, masakruar dhe të shpërngulur që presin të prehen në një varrezë, si për çdo njeri në këtë tokë",- deklaroi PDIU.