Barcelona turpëron Realin, 5 gola dhe lavdi katalanase

Pa Mesin dhe pa Ronaldon, por "El Clasico" dhuron sërish spektakël dhe një rezultat 5- 1 Lopetegi i ka orët e numëruara, Konte dhe Solari në pritje

Nis me Barçën në sulm, tendencë kjo që nuk ndryshon ndonjëherë. Superioritet në mesfushë, rrezikshmëri ofensive, përqendrim dhe determinim. Gjithçka në favor të Barçës. Madridi është në ngërç, konfuz dhe i shpërbërë, ndaj e sheh veten në disavan- tazh pas 11 minutash: që nga fillimi katalanët sulmojë pikën e dobët të Realit, krahun e djathtë të mbrojtur nga Naço. Rakitiç bën të shpërthejë Zhordi Albën që gjen fundoren dhe pason në qendër për Kutinjon, që gjakftohtë shënon golin e parë. Reali është edhe më shumë i trullosur kur pas gjysmë ore VAR- i i lejon gjyqtarit Sançez Martinez të korrigjojë gabimin e tij fillestar dhe të vërshëllejë një penallti të kotë të shkaktuar nga Varane nda Suarezit, me uruguajanin që më pas mposhti Kurtuan. Për Madridin pjesa e parë regjistroi vetëm disa gjuajtje nga jashtë zonës, por asnjë ide dhe vështirësi shumë të madhe përpara Barcelonës, që pati mundësi të tjera shënimi.

RILINDJA

Madridi e nisi pjesën e dytë me Lukas Vaskezin në vend të Varanes, që pati një problem muskulor. Spanjolli pozicionohet në krah, Naço del në qendër ku shkëmbehet me Kasemiron, që formon kështu një mbrojtje treshe me Ramosin. Madridi, që u pa i vdekur në pjesën e parë, u rigjallërua shpejt: zbritje në të djathtë e Izkos, krosim që Ter Shetegen nuk e ndal dot dhe Marselo që shënon pasi ka mposhtur Piken. Braziliani ka shënuar 3 nga 4 golat e fundit të Realit me të djathtën e tij.

DY SHTYLLAT

Dhe një çast pas rezultatit 21, Modriç goditi shtyllën e Ter Shtegenit, që nuk mund të bënte asgjë. Barcelona që ishte si e trullosur, merr ngjyrë pas gati çerek ore, kur Suarez në akrobaci ndalet, gjithash- tu, nga shtylla pasi u shërbye nga Sergi Roberto. Por sistemi i ri i lojës ka transformuar Madridin, që pati në kokën e Benzemasë mundësinë e radhës për të shënuar. Por gjuan jashtë dhe kush e di sa vetë në Madrid kanë çuar ndërmend Kristiano Ronaldon...

SUAREZ DHE "MANITA"

Dhe e merrni me mend sesa mbaroi ndesha? Vetëm pak pas asaj çka shpërdoroi Benzema, kemi një krosim nga ana tjetër e fushës me Sergi Roberton që gjen kokën e Suarezit, me këtë të fundit që gjuan saktë nga 13 metrave larg portës. 3- 1, por "El Pistolero" nuk ndalet këtu, kur shënon tregolëshin pasi përfitoi nga një gabim i Ramosit dhe me një lob perfekt kaloi Kurtuanë për rezultatin 4- 1. Në çastet e fundit të ndeshjes ka lavdi dhe Arturo Vidalin, që shërbehet në zonë nga Dembele dhe me kokë vulos rezultatin 5- 1 për Barcelonën, që e mbyll kështu "tour de force" pasi pat mposhtur 4- 2 Seviljen dhe 2- 0 Interin.