Lleshi ofron zgjidhje për ngërçin, largohet nga ushtria
"Nuk jam më ushtarak aktiv, por i liruar"
Ashtu
siç edhe pritej, palët që janë përfshirë në ngërçin institucional për emërimin e ministrit të ri të Brendshëm, kanë dhënë dje shenja shtensionimi mes tyre. Dhe për këtë ka menduar vetë i zgjedhuri i kryeministrit Edi Rama për të qenë ministër i Brendshëm, gjeneral Sandër Lleshaj, i cili nëpërmjet një letre drejtuar Presidentit të Republikës kërkon largimin nga gjendja e ushtarakut aktiv, duke hequr dorë përfundimisht nga e drejta për të riveshur uniformën ushtarake. Letra është publikuar dje nga kryeministri, Edi Rama dhe ajo përmban një shpjegim të Lleshajt mbi gjithë procesin gjyqësor dhe statusin e tij aktual në raport me forcat ushtarake. "Me pranimin e këtij propozimi, i cili lidhet në mënyrë pandashme me mosushtrimin e funksionit të ushtarakut, unë kam vendosur edhe heqjen dorë nga karriera ime ushtarake. Deklaroj me anë të kësaj letre se, në cilësinë e gjyqfituesit, me institucionin që ju drejtoni dhe me Ministrinë e Mbrojtjes, heq dorë plotësisht nga të gjitha të drejtat që burojnë nga vendimi i gjykatës", shprehet Lleshi në letrën e tij dërguar Metës. Më tej, ai shpreh bindjen se kjo kërkesë do të merret në konsideratë prej presidentit, duke bërë të ditur se nga ky moment nuk është më ushtarak aktiv. "Në interpretimin tim nuk ka pengesë ligjore për dekretimin tim nga ana juaj, por mirëpres çfarëdolloj akti administrativ nga ana juaj apo e çdo organi përgjegjës të parashikuar në ligj, që do të qartësonte dhe do të vendoste pa asnjë keqkuptim se nuk jam më ushtarak aktiv, por i liruar nga shërbimi aktiv ushtarak", shkruan Lleshaj, i cili thekson se e ndërmerr këtë hap për t'i dhënë zgjidhje "ngërçit kushtetues". Pavarësisht këtij hapi, ai shprehet se pavarësisht vendimit të gjykatës, ai nuk është ushtarak aktiv, por vetëm gjyqfitues.