Kontrabandë me gomat e përdorura, arrestohen 5 doganierë të Qafë- Thanës
Sekuestrohen 2100 goma, prangosen dhe 4 persona të tjerë Policia e SHÇBA: Akuzohen për shpërdorim detyre
Nëntë persona, ku pesë prej të cilëve punonjës së doganës së Qafë- Thanë janë arrestuar për kontrabandë të gomave të përdorura. Shërbimi për Çështjet e Brendshme dhe Ankesat ( SHÇBA) në bashkëpunim me Drejtorinë Vendore të Policisë Korçë dhe Prokurorinë pranë Gjykatës së Shkallës së Parë Pogradec finalizuan me sukses një operacion të ndjekur me metoda speciale të hetimit. Mësohet se punonjësit e doganës në fjalë akuzohen për veprën penale "Shpërdorim detyre", pasi favorizonin kontrabandë gomash makinash. Përveç punonjësve, në pranga kanë përfunduar edhe 4 persona të tjerë. Burime zyrtare nga drejtoria e Policisë së qarkut të Korçës bënë me dije se në sajë të një pune të mirëorganizuar nga strukturat e lartpërmendura, u bë i mundur arrestimi në flagrancë i shtetasve: Stefan Hila, 50 vjeç, banues në Pogradec, me detyrë përgjegjës turni në Doganën e Qafë Thanës; Anesti Tushinka, 40 vjeç, banues në Pogradec, me detyrë doganier parkingu pranë Doganës në Qafë Thanë; Ilir Spahiu, 44 vjeç, banues në Pogradec, me detyrë doganier pranë Doganës në Qafë Thanë; Lefter Duraj, 64 vjeç, banues në Tiranë, me detyrë përgjegjës turni i grupit të antikontrabandës, pranë Drejtorisë së Përgjithshme të Doganave dhe Mikel Goxharaj, 41 vjeç, banues në Tiranë, me detyrë inspektor i grupit të antikontrabandës pranë Drejtorisë së Përgjithshme të Doganave, ( të pestë për veprën penale "Shpërdorim detyre"). Po të njëjtat burime thanë se janë prangosur dhe shtetasit: Kelti Ristani, 42 vjeç, banues në Pogradec, me detyrë agjent doganor i një kompanie me seli në degën doganore Qafë Thanë; Edmond Kodra, 61 vjeç, banues në fshatin Sovjan, Korçë, poseduesi i gomave; Stojmir Treneski, 42 vjeç, banues në Ohër, Maqedoni, shoferi i kamionit si dhe Petraq Dimko, 54 vjeç, banues në fshatin Sovjan, Korçë, poseduesi i ambientit ku magazinohej malli kontrabandë. Sipas hetuesve të çështjes, arrestimi i shtetasve të mësipërm, u krye pasi, në bashkëpunim me njëri- tjetrin, dyshohet se kanë bërë të mundur futjen kontrabandë të një kamioni me rreth 2100 goma të përdoruara, nëpërmjet Pikës së Kalimit Kufitar Qafë- Thanë, të ngarkuara në mjetin tip kamion me drejtues shtetasin Stojmir Treneski, i cili u ndalua mbrëmjen e djeshme, nga shërbimet e policisë në aksin rrugor PogradecMaliq, pranë fshatit Sovjan, teksa po tentonte të shkarkonte mallin e kontrabanduar, në magazinën e Petraq Dimkos. Në vijim të veprimeve procedurale, u bë sekuestrimi i kamionit që transportonte mallin kontrabandë së bashku me mallin ( rreth 2100 goma të përdorura). Ndërsa, vijojnë hetimet për të dokumentuar veprimtarinë e personave të tjerë që mund të jenë implikuar në këtë linjë kontrabandimi.