PS drejt rrëzimit të dekretit të Metës për kreun e KLSH- së
Shumica qeverisëse ka paralajmëruar votën kundër zgjedhjes së Vitore Tushës "Primare për ne mbetet jetësimi i reformës në drejtësi"
Mazhoranca duket se është e gatshme që të hapë një tjetër konflikt me Presidentin e Republikës, Ilir Meta. Kjo pasi shumica qeverisëse është e gatshme të rrëzojë propozimin e kreut të shtetit për të zgjedhuar Vitore Tushën në krye të Kontrollit të Lartë të Shtetit. Këtë ka lënë të kuptohet kryetari i Komisionit të Ligjeve, Ulsi Manja, i cili gjatë një interviste për emision "45 minuta" ka deklaruar se Vitore Tusha është anëtare e Gjykatës Kushtetuese dhe si anëtarja me më shumë përvojë në këtë institucion është edhe automatikisht nënkryetare e Këshillit të Emërimeve në Drejtësi. Sipas tij zgjedhja e saj në KLSH do të krijonte një boshllëk në një nga institucionet kyçe për vijimin e ngritjes së disa institucioneve të reja që janë parashikuar nga reforma në drejtësi. Dhe sipas socialistëve reforma në drejtësi ka më shumë rëndësi se sa KLSH. "Ne e kemi bërë të qartë qëndrimin tonë që ndërmjet KED i hap rrugë krijimit të Gjykatës Kushtetuese dhe shpalljes së garës për Inspektorin e Lartë të Drejtësisë, dy organe të rëndësishme, jetike për vendin. Ne kemi thënë që primare për ne si maxhorancë, mbetet jetësimi dhe zbatimi me sukses i reformës në drejtësi. Ky është qëndrim i qartë politik i joni"
. Ligji thotë se njëri nga anëtarët e Gjykatës Kushtetuese, më i vjetri në moshë, automatikisht është nënkryetar i KED. Vitore Tusha, sipas këtij përcaktimi, është nënkryetare e KED. Znj. Vitore Tusha gëzon respektimin maksimal, është vetuar me sukses si dhe ka dhënë kontribut aktualisht edhe në KED", tha Manja. Ai shtoi se sipas ligjit tashmë procesi i zgjedhjes së anëtarëve të KED ka nisur dhe nuk ka më kohë për të bërë ndryshime të tjera që do ta bënin këtë gjë të pamundur. "Pas datës 15 nëntor, sipas ligjit, presidentit duhet t'i shkojë lista e anëtarëve nga Gjykata Kushtetuese, Gjykata e Lartë, KLD dhe Prokuroria e Përgjithshme. Presidenti ka detyrimin kushtetues dhe ligjor të hedhë shortin dhe nga ky short del përbërja e KED që janë një anëtar i Gjykatës së Lartë, dy anëtarë të Gjykatës Kushtetuese, një prokuror nga Prokuroria e Përgjithshme, dy nga prokuroritë e Apelit, dy gjyqtarë nga gjykatat e apelit, dhe një gjyqtar i Administratives. Kjo është përbërja me 9 anëtarë e KED. Nga praktikat e dy viteve të mëparshme, ne presim një vendimmarrje nga Presidenti. Nëse nuk e ushtron të drejtën e shortit, kushtetuta ia kalon Kuvendit, i cili ndërmjet 5- 10 dhjetor është i detyruar të hedhë shortin", tha Manja. Në fakt këtë vendimmarrje për rrëzimin e Vitore Tushës e paralajmëroi pak ditë më parë edhe kryetari i grupit socialistë, Taulant Balla, i cili teksa vlerësoi pozitivisht kandidaturën e saj, tha se gjithsesi për mazhorancën më e rëndësishme ishte reforma në drejtësi. Natyrisht që në rast se mazhoranca do të votonte kundër kandidaturës së saj, atëherë ky do të ishte një shkak tjetër që përplasja mes shumicës dhe presidentit të vazhdonte edhe më tej. "Ne e kemi bërë të qartë qëndrimin tonë që ndërmjet KED i hap rrugë krijimit të Gjykatës Kushtetuese dhe shpalljes së garës për Inspektorin e Lartë të Drejtësisë, dy organe të rëndësishme, jetike për vendin. Ne kemi thënë që primare për ne si maxhorancë, mbetet jetësimi dhe zbatimi me sukses i reformës në drejtësi. Ky është qëndrim i qartë politik i yni"