PS: Vetingun në politikë do e bëjmë përmes reformës në drejtësi
Ministrja e Drejtësisë priti ekspertët e "Venecias"
Në
vijim të takimeve me përfaqësuesit e partive dhe institucioneve shqiptare, delegacioni i Komisionit të Venecias është takuar dje edhe me ministren e Drejtësisë, Etilda Gjonaj. Ministrja vlerësoi rolin e Komisionit të Venecias si një partner shumë i rëndësishëm që ka kontribuar dhe bashkëpunuar efektivisht në shumë procese të rëndësishme për Shqipërinë dhe sidomos për reformën në drejtësi. Gjatë takimit ministrja Gjonaj iu përgjigj interesimit të tyre lidhur me projekt propozimin e Partisë Demokratike për vetingun e politikanëve, duke vënë theksin tek ngritja e institucioneve të reja të drejtësisë, të cilat do të bëjnë pastrimin e politikës nga zyrtarë të inkriminuar apo të korruptuar. Ajo u shpreh se tashmë është vendosur një standard i ri me ndryshimet kushtetuese të vitit 2016 për reformën në drejtësi, duke Iu nënshtruar më parë një procesi konsultimi me konstitucionalistë, ekspertë dhe shoqërinë civile, standard i cili duhet të ruhet në çdo rast të ndryshimeve kushtetuese. Sistemi i ri i drejtësisë, ngritja e institucioneve të SPAK garantojnë ndëshkueshmërinë e zyrtarëve të lartë pasi është një sistem i depolitizuar dhe i pavarur. Ndërkohë që nga ana tjetër përfaqësuesit e opozitës këmbëngulin që edhe për politikanët të ushtrohet i njëjti standard si edhe me gjyqtarët dhe prokurorët. Ministrja i informoi anëtarët e Venecias lidhur me ndryshimet e kuadrit ligjor për përjashtimin e të gjithë kompanive duke përfshirë dhe administratorët dhe ortakët, të cilët kanë precedentë penalë, për të përfituar nga fondet publike.