Mbyllet misioni, FMN: Kujdes me koncensionet!
Tri institucionet financiare vlerësojnë ecurinë e ekonomisë shqiptare Sejko: Deficiti dhe borxhi, në rënie
Me rastin e largimit të Fondit Monetar Ndërkombëtar në Shqipëri, ministri i Financave dhe Ekonomisë, Arben Ahmetaj; guvernatori i Bankës së Shqipërisë, Gent Sejko dhe shefi i misionit Jan Kees Martijn kanë dalë mbrëmë në një konferencë të përbashkët për mediat, ku kanë vlerësuar ecurinë e ekonomisë së Shqipërisë dhe pritshmëritë e buxhetit të ri. Gjatë fjalës së tij, guvernatori i Bankës së Shqipërisë, Gent Sejko deklaroi se deficiti buxhetor është i ulët dhe borxhi publik është në rënie të vazhdueshme. "Duhet të vijojnë reformat strukturore në Shqipëri. Deficiti buxhetor i ulët dhe borxhi është në rënie. Bazat e zhvillimit të vendit mbeten solide, ndërsa duhet përmirësim i zhvillimit të sistemit financiar", - tha Gent Sejko. Ai gjithashtu theksoi se çelja e negociatave duhet parë si një instrument parësor i zhvillimit të vendit. Sipas tij, Banka e Shqipërisë, vlerëson se përmbushja e kritereve për çeljen e negociatave është me rëndësi të madhe për ecurinë ekonomike të vendit. Po ashtu, një tjetër faktor ndikues në zhvillimin ekonomik të qëndrueshëm sipas Sejkos është edhe zhvillimi i sistemit financiar. Ndërsa është ndalur më tej tek sektori bankar, ai ka deklaruar se ky i fundit paraqitet i qëndrueshëm dhe shfaqet rezistent ndaj situatave të mundshme të stresit. "Sektori bankar është i qëndrueshëm, me përmirësim të kapitalit dhe likuiditetit. Ky sektor shfaqet rezistent, ndaj situata të mundshme të stresit. Kjo analizë pasqyrohet edhe në projeksionet tona, që parashikojnë vazhdimin e rritjes ekonomike në planin afatmesëm", u shpreh Sejko.
FMN
Ndërkohë që përfaqësuesit e FMN- së janë shprehur se formula e Partneritetit Publik- Privat është një mundësi për përmirësim të menaxhimit të projekteve, por duke vënë theksin se ka disa vende ku PPP kanë shkuar në probleme financiare dhe përdorimi i tyre duhet të jetë shumë i kujdesshëm. Gjithashtu, kreu i misionit të FMN- së, Jan Kees Martijn u shpreh se ekonomia e Shqipërisë ka prirje rritëse, por në të
njëjtën kohë mbetet ende shumë për të bërë që ajo të jetë më e qëndrueshme, gjithëpërfshirëse dhe sidomos amortizuese për emigracionin. Ai tha se qeveria shqiptare duhet të zbatojë reforma strukturore, në mënyrë që të dekurajojë emigracionin e lartë. "Parashikojmë rritje ekonomike 4% këtë vit dhe 3.7% vitin e ardhshëm. Ndërsa në periudhë afatmesme shkalla e rritjes do të jetë 4% e mbështetur nga rritja e eksporteve
dhe investimeve në infrastrukturë dhe turizmit", tha përfaqësuesi i Misionit të FMN- së, Jan Kees Martijn. Gjithashtu, ai shtoi se rreziqet ndaj ekonomisë shqiptare vlerësohen në rënie. Shqipëria është ekspozuar nga rreziqet me vendet partnere në Europë, dobësitë e të cilave do të ndikonin negativisht në investimet e huaja, të ardhurat nga emigrantet dhe eksportet. Ndërsa në rrafshin fiskal, FMN- ja sugjeroi se konsolidimi fiskal
duhet përshpejtuar. "Nevojitet ulja e deficitit fiskal. Ne projektojmë se në mungesë të masave fiskale shtesë deficiti fiskal do të jetë jo më pak se 2% e PBB- së. Reduktimi i borxhit publik do të jetë më i ngadaltë se pritjet tona", tha eksperti i Fondit. Eksperti FMN tha se rritja e shpejtë e PPPve kërkon përmirësime shtesë në të gjitha nivelet e qeverisjes, ndërsa kërkoi që rritja e detyrimeve të prapambetura duhet të trajtohet pa vonesë.