TRAJNERI I SHQIPËRISË

Pas një shembjeje si ajo ndaj Skocisë, fitorja ndaj Uellsit ishte detyrim moral i lojtarëve ndaj fanellës dhe ndaj tifozërisë. Ndaj, kuqezinjtë nuk zhgënjejnë në miqësoren e djeshme, duke triumfuar 1- 0 përballë Bejlit me shokë dhe duke minimizuar në maksimum gabimet e shfaqura me skuadrën tjetër britanike të shtunën. Natyrisht që ky sukses nuk vlen pikë, por të paktën vlen për të zhbërë disi imazhin e shëmtuar të "Loro Boriçit". Panuçi e nis ndeshjen me Etrit Berishën në portë, ndërsa në mbrojtje rikthehet Hysaj në të djathtë dhe me Ismajlin, që merr vendin e Gjimshitit të dëmtuar. Tjetër rikthim në mesfushë, ai i Migjen Bashës, që krijon repartin me Xhakën dhe Linën, ndërsa në sulm krahët nuk ndryshojnë, me Uzunin e Grezdën që mbështetin Bekim Balajn, i rikthyer titullar në këtë sfidë. Pjesa e parë nis më mirë për Uellsin ( minuta e 23- të), por që gjithsesi nuk do të kërcënojë kuadratin e Berishës. Me kalimin e minutave rritet loja e Shqipërisë, por gjithsesi pjesa e parë mbyllet me rrjeta të paprekura. E dyta fillon shumë më mirë për kuqezinjtë, që nisin disa sulme radhazi në zonën e Uard, ndërsa sfida do të kulmojë në minutën e 58të, kur Bekim Balaj do ta shndërrojë në gol penalltinë e fituar nga Taulant Xhaka. Shqipëria luan më mirë dhe i shkon pranë dyfishimit me Uzunin ( minuta 63), ndërsa në minutën e 67- të, uellsianët pretendojnë një 11- metërsh për faull të Bashës, por gjyqtari maqedonas Dejan Jakimovski nuk e sheh kontaktin, ndërsa pak minuta më pas ( 77) protestojnë ashpër ishullorët te kryesori për një faull në zonë si pasojë e kthimit të topit te Berisha, që e kontrollon me duar, por kryesori edhe njëherë vijon lojën. Më pas, Shqipëria ka mundësi të mira ta mbyllë sfidën nëpërmjet kundërsulmit, por nuk do t'ia arrijë, ndërsa rezultati nuk do të ndryshojë më deri në fund të takimit, me Sh- qipërinë që gjen fitoren pas katër ndeshjesh, ku kishte koleksionuar 3 humbje e një barazim.