Paketa antishpifje, Rama depoziton 6 padi kundër Bashës dhe Berishës

Kryeministri akuzon kreun e PD se ka shpifur kundër tij

paditë e firmosura nga kryeministri i vendit janë kundër dy kundërshtarëve të tij politikë, Lulzim Basha dhe Sali Berisha. Për kryeopozitarin Basha, kryeministri ka depozituar katër padi. Të gjitha ato janë për "shkaktim dëmi". Sipas burimeve të "ABC Neës", në përmbajtjen e tyre Rama konsideron si shpifëse disa deklarata publike të bërë nga kryetari i Partisë Demokratike. Ndërsa kundër ish- kryeministrit Sali Berisha, Rama ka dorëzuar dy padi në gjykatë. Por, kryeministri nuk është i vetëm përfaqësues i mazhorancës që ka depozituar padi për shpifje kundër opozitës. Kjo, pasi në regjistrin e çështjeve në Gjykatën e Tiranës rezulton edhe padia e Taulant Ballës kundër deputetit demokrat Gent Strazimiri. Paditë në fjalë janë hedhur në short dhe regjistruar, ndërsa në ditët në vijim pritet të nisë edhe shqyrtimi i tyre. Sipas deklaratave të bëra nga Rama më parë, të gjitha paratë që do të fitohen nga gjyqet për shpifje do të shkojnë në Fondin e Edukimit, fond që do të mbështetë çerdhet dhe kopshtet.