Nuk ka veting për politikanët, PS rrëzon nismën e PD- së
Këshilli i Legjislacionit rrëzoi me 12 vota kundër nismën e demokratëve Seancës plenare do t'i shkojë raporti me dy qëndrime
Politikanët ndryshe nga gjyqtarët dhe policët nuk do t'i nënshtrohen kontrollit të imtësishëm apo siç njihet ndryshe vetingut. Kjo, pasi mazhoranca, pa pritur vendimin përfundimtar të Komisionit të Venecias, ka rrëzuar nismën e Partisë Demokratike për të sanksionuar me ligj detyrimin që edhe politikanët t'i nënshtrohen vetingut. Vendimi është marrë dje në mbledhjen e Këshillit për Legjislacionin dhe Komisioni për Çështjet Ligjore, Administratën Publike dhe të Drejtat e Njeriut, ku të pranishëm kanë qenë edhe përfaqësuesit e opozitës. Me 8 vota "pro" të deputetëve të djathtë dhe 12 vota "kundër" të deputetëve të mazhorancës, Këshilli hodhi poshtë projektligjin e paraqitur nga PD, ndërsa vendosi që seancës plenare t'i shkojë për miratim një raport me dy opinione, atë me qëndrimin e mazhorancës dhe atë me qëndrimin e opozitës. Relatori i opozitës, Oerd Bylylbashi dhe relatorja e shumicës parlamentare, Vasilika Hysi i paraqitën këshillit qëndrimet respektive. Kështu, Bylykbashi në emër të opozitës kërkoi miratimin e këtyre propozimeve, duke theksuar se ekziston mundësia që pas ndryshimeve në Kushtetutë, vërejtjet që bën Komisioni i Venecias mund të reflektohen në miratimin e një ligji të posaçëm për vetingun në politikë. "Mund të bëjmë përmirësime ligjore nëse nisma shqyrtohet nen për nen, të miratojmë ndryshimet kushtetuese e më pas të bëjmë ligjin e posaçëm për vetingun në politikë", tha Bylykbashi. Ndërsa, zëvendëskryetarja e Kuvendit të Shqipërisë, Vasilika Hysi theksoi se Komisioni i Venecias ka gjetur probleme në draftin e propozuar nga opozita. "Komisioni i Venecias na ka dhënë leksion se vetingu i gjyqtarëve nuk është i njëjtë me atë në politikë. Të mos e miratojmë nismën e PD dhe LSI në seancën plenare", - u shpreh Hysi. Por sipas Bylykbashit, Komisioni i Venecias ka bërë me dije se qëllimi i draftit ishte legjitim, ndërsa gjithë të tjerat janë teknikalitete që mund të rregullohen. Pjesë e debatit u bënë edhe anëtarët e tjetër të këshillit, të cilët mbrojtën qëndrimet e shprehura edhe nga dy relatorët. Pas diskutimeve të anëtarëve të mbledhjes së përbashkët të Komisionit të Ligjeve dhe Këshillit për Legjislacionin dhe në mungesë të një konsensusi mes palëve, nisma u hodh në votim, duke rrëzuar me shumicë votash kundër. Sipas Rregullores së Kuvendit, raporti i shumicës parlamentare dhe mendimi i pakicës parlamentare për këtë projektligj do t'i paraqiten për shqyrtim seancës plenare. Ndërkohë që vendimin final pritet ta mbajë se- anca plenare, e cila pritet ta marrë në shqyrtim brenda dhjetorit. Natyrisht që ky vendim i mazhorancës pritet të acarojë edhe më tej krizën politike në vend, pasi opozita miratimin e këtij projektligji e ka përcaktuar si kusht për t'u kthyer në sallën e parlamentit.
VETINGU
Mazhoranca ka rrëzuar pa pritur vendimin përfundimtar të Komisionit të Venecias, nismën e Partisë Demokratike për të sanksionuar me ligj detyrimin që edhe politikanët t'i nënshtrohen vetingut. Vendimi është marrë dje në mbledhjen e Këshillit për Legjislacionin dhe Komisioni për Çështjet Ligjore, Administratën Publike dhe të Drejtat e Njeriut, ku të pranishëm kanë qenë edhe përfaqësuesit e opozitës.