Kuvendi hedh shortin për anëtarët e KED, PD: Proces i jashtëligjshëm
Demokratët akuzuan mazhorancën se me këtë akt po synon të kapë drejtësinë Goglat përcaktuan 8 anëtarët e rinj
Kuvendi ka zgjedhur dje 8 anëtarët e rinj të Këshillit të Emërimeve në Drejtësi. Ashtu siç edhe pritej, Kuvendi hodhi shortin pas refuzimit të Presidentit Ilir Meta për të mos e ushtruar këtë të drejtë për shkak të vakumit ligjor. Shorti ka nxjerrë 8 fitues, duke lënë një vend vakant nga Prokuroria e Apelit, pasi kishte kandidatë vetëm për një vend vakant. Në përfundim të hedhjes së shortit, kryetari i Kuvendit Gramoz Ruçi, shpalli emrat e anëtarëve të Këshillit të Emërimeve në Drejtësi të përzgjedhur nga shorti. Kështu, Vitore Tusha dhe Bashkim Dedja u zgjodhën si përfaqësues të vetëm të Gjykatës Kushtetuese, Ardian Dvorani si përfaqësues i Gjykatës së Lartë, Arta Marku si përfaqësuese e Prokurorisë së Përgjithshme, Atri Islamaj dhe Margarita Buhali si përfaqësues të Gjykatës së Apelit, Fatjona Memçaj si përfaqësuese e prokurorisë pranë gjykatave të apelit dhe Eriol Roshi nga gjykatat administrative. Ndërkohë që shorti përcaktoi edhe 3 anëtarë zëvendësues për në KED dhe përkatësisht emrat e anëtarë zëvendësues të Këshillit të Emërimeve në Drejtësi Medi Bicit, Gurali Brahimllari dhe Klodiana Veizi. Por opozita e kundërshtoi hedhjen e shortit, duke theksuar se ai zhvillohet në vakum ligjor, ndërsa theksoi se qëllimi i tij është kapja e sistemit të drejtësisë. Gjatë fjalës së tij, deputeti i PD, Oerd Bylykbashi tha se hedhja e shortit bëhet në kundërshtim me Kushtetutën e ligjin, pasi mungon baza ligjore. "Presidenti thotë se ka vakum ligjor dhe dispozitat tranzitore kanë mbyllur efektin e tyre. Kandidatët filtrohen nga 3 organe kushtetuese, Gjykata Kushtetuese, KLGJ e KLP, të cilat nuk janë ngritur ende. Qëllimi është kapja e sistemit të drejtësisë nga mazhoranca. Tërhiquni nga ky short sot dhe plotësoni vakumin ligjor për funksionimin e KLGJ e KLP", tha BYlykbashi. Ndërkohë që kryetari i Kuvendit, Gramoz Ruçi tha se procedura për hedhjen e këtij shorti ishte konsultuar edhe me përfaqësues të institucioneve ndërkombëtare. "Letrën e
presidentit për shortin e kam konsultuar me ekspertet ligjore te kuvendit, EURALIUS, OPDAT. Sot është rendi që hidhet shorti. Për shortin e KED, Gjykata Kushtetuese ka sjellë dy kandidatura. Për këtë nuk mund të hidhen shorti pasi janë vetëm dy kandidate për
dy poste dhe dy kandidaturat vlerësohen automatikisht të zgjedhur. Bëhet fjalë për Bashkim Dedja dhe Vitore Tusha", tha Ruçi. Ndërkohë që më parë të drejtën për hedhjen e këtij shorti i kishte Presidenti i Republikës, Ilir Meta. Ai nuk pranoi ta ushtrojë këtë
të drejtë me argumentin se ka vakum ligjor. "Për shkak të vakumit ligjor nuk e hedh dot shortin e KED. Ndërhyni në ligj ose në të kundërt hidheni vetë shortin sipas precedentit të vjetshëm", - thuhet ndër të tjera në shkresën e presidentit, drejtuar Kuvendit.