U sekuestrohen mina me telekomandë, arrestohen dy persona nga Kukësi
KRUJË - Policia e Durrësit dhe ajo e Krujës kanë finalizuar operacionin e koduar "Muzgu" duke goditur një grup që trafikonte lëndë plasëse dhe radioaktive. Në operacion janë sekuestruar mina me telekomandë, ndërsa janë vënë në pranga dy persona. Specialistët e Seksionit për Hetimin e Trafiqeve të Paligjshme dhe Narkotikëve në Drejtorinë Vendore të Policisë Durrës, në bashkëpunim dhe me Prokurorinë pranë Gjykatës së Shkallës së Parë Krujë, mbrëmjen e së enjtes kanë arrestuar në flagrancë për veprën penale "Trafikimi i lëndëve plasëse, djegëse, helmuese dhe radioaktive" e kryer në bashkëpunim, shtetasit: A. B, 38 vjeç dhe H. Gj, 26 vjeç, të banues në Kukës. Mbi bazën e informacioneve të marra në rrugë operative nga ana e Strukturave policore se shtetasit e mësipërm trafikonin lëndë plasëse, në momentin e arrestimit të tyre në Thumanë, brenda një çante në ngjyrë të zezë u janë gjetur dhe sekuestruar në cilësinë e provave materiale tre kallëpe cilindrike të mbështjellë me letër kartëpecetë dhe natriban transparent, ku ishin të vendosura tre kapsolla detonatore të lidhura me tel përcjellës të kapura me natriban, ku në anën tjetër ishin të bashkuara me dy aparate celularë të markës "Nokia". Kallëpet ishin me peshë rreth 225, 240 dhe 469 gr secili. Sipas informacioneve këto mina me telekomandim, mund të përdoreshin në kryerjen e veprave të rënda kriminale. Materialet do t'i kalojnë Prokurorisë pranë Gjykatës së Shkallës së Parë Krujë për veprime të mëtejshme.